Митта Ваçлей ячĕллĕ Первомайскинчи вăтам шкул спорт залĕнче маларах директорта ĕçленĕ, физика предметне вĕрентнĕ Геннадий Бойкова асра тытса йăлана кĕнĕ шахмат турнирĕ иртнĕ. Кăçалхипе вăл 10-мĕш хут пулнă. Унта хутшăнакансен йышĕ çулсерен ỹсни савăнтаратех. Шахмат хăми умне шкул ачисем те, ветерансем те ларнă. Çакă вăййа килĕштерекен тĕрлĕ ăрăва пĕрлештернине çирĕплетет. Маларах шкул шайĕнче иртнĕ турнира халĕ регион тулашĕнчи шахмат ăстисем те явăçни савăнтарать.

Турнира Патăрьел тата Комсомольски муниципалитет округĕсенчен, çавăн пекех Самар облаçĕнчен 50 ытла шахматист хутшăннă. Вăййăн çак енне кăмăллакансем хушăнса пыни турнир сумне тата та ỹстерет.

Официаллă пайра Геннадий Александрович пирки нумай ăшă сăмах каланă. Чылайăшĕ вăл профессие чунтан парăннине, хăйĕн пĕлĕвне ачасем патне тăрăшса çитернине палăртнă.

Çĕнтерỹçĕсемпе призерсем дипломсене, парнесене тивĕçнĕ.

 Альбина КАПИТОНОВА