Патăрьел муниципалитет округĕн администрацийĕ çумĕнчи çул çитмен ачасен прависене хỹтĕлес тĕлĕшпе тимлекен комиссин анлă ларăвĕнче пăхса тухнă ыйтусем хыççăн Патăрьел мунициалитет округĕн пуçлăхĕн социаллă ыйтусемпе ĕçлекен çумĕ-комисси председателĕ Светлана Чернова çирĕп пĕтĕмлетỹ турĕ: "Хальхи вăхăтра çул çитмен ачана тĕрĕс çул çине тăма, тивĕçлĕ воспитани илме, çĕршывшăн юрăхлă çын пулса ỹсме шкулпа çемьен пĕрлехи вăйĕ çеç мар, профилактика субъекчĕсем пĕр чăмăрта ĕçлени те пысăк пĕлтерĕшлĕ".

Комиссин анлă ларăвĕн кун йĕркине лартнă ыйтусем пурте çивĕч, çав вăхăтрах паянхи кун пурне те пăшăрхантараççĕ те. Тĕп ыйтусемпе - тăлăх ачасене, ашшĕ-амăшĕсĕр юлнă пепкесене çемьесене вырнаçтарасси, ачасене хăйсен хỹтлĕхне илнисем право йĕркине çирĕп пăхăнасси пирки округ администрацийĕн опекăпа попечительство секторĕн заведующийĕ Татьяна Чылыкова, культура учрежденийĕсем çул çитмен ачасем обществăшăн сиенлĕ çул çине тăрасран асăрханас тĕллевпе пурнăçлакан ĕçсем пирки Патăрьел муниципалитет округĕн администрацийĕн культура, туризм, информаци тивĕçтерĕвĕн пай пуçлăхĕ Наталия Никитина тата Патăрьелĕнчи централизациленĕ клуб системин директорĕ Наталия Алексеева паллаштарчĕç.

Çавăн пекех ларура Турханти вăтам шкулпа территори пайĕн, Патăрьелĕнчи агропромышленность техникумĕн представителĕсем çул çитмен ачасем право йĕркине пăхăнас тĕлĕшпе туса пыракан профилактика мероприятийĕсем пирки каласа кăтартрĕç, ку тĕлĕшпе уйрăмах шухă, шутра тăракан ачасемпе уйрăммăн ĕçлемеллине, вĕсене тата ытларах тимлĕх уйăрмаллине çивĕчлетрĕç.

Пĕлме

2023 çулхи октябрĕн 1-мĕшĕ тĕлне Патăрьел муниципалитет округĕн администрацийĕ çумĕнчи çул çитмен ачасемпе тимлекен комиссинче тĕрлĕрен сăлтавпа çул çитмен 19 ача шутра тăрать.

Хальхи вăхăтра социаллă хăрушлăх кăларса тăратакан 48 çемьере çул çитмен 125 ача çитĕнет.

2023 çулта çул çитмен ачасемпе тимлекен комисси профилактика субъекчĕсемпе пĕрле 96 рейд ирттернĕ, 264 çемьере пурăнакан ачасен условийĕсене тĕрĕсленĕ.

Альбина ЕГОРОВА