Чăваш Енре шкул театрĕсен "Асам" республика фестивалĕн финалти тапхăрĕ пырать. Ăна Раççей Федерацийĕн Патшалăх Думин депутачĕ Алла Салаева пуçарăвĕпе йĕркеленĕ. Фестивалĕн муниципалитет шайĕнчи конкурсĕ мартăн 14-мĕшĕнчен пуçласа майăн 25-мĕшĕччен иртнĕччĕ. Чи лайăххи ята тивĕçессишĕн халĕ 29 коллектив тупăшать. Вĕсем хăйсен спектаклĕсене чăваш театрĕсемпе культура учрежденийĕсен лапамĕсенче кăтартаççĕ.

 Ноябрĕн 12-мĕшĕнче Константин Иванов ячĕллĕ Чăваш академи драма театрĕнче паллă пулăм - "Асам" шкул театрĕсен республикăри финалти тапхăрĕпе килĕшỹллĕн Патăрьел муниципалитет округĕн театр кунĕ иртрĕ.

Унта пухăннисене Патăрьел муниципалитет округĕн пуçлăхĕн социаллă ыйтăвĕсемпе ĕçлекен çумĕ, администрацин финанс пайĕн начальникĕ Светлана Чернова саламларĕ.

Фестивалĕн муниципалитет тапхăрĕнче çĕнтернĕ Шăнкăртамри пĕрремĕш вăтам шкул коллективĕ кунта хăйĕн ĕçĕпе тухрĕ. Ачасем тỹресен умĕнче пурнăçран илнĕ "Сăр шурăмпуçĕ лăпкă..." спектакль кăтартрĕç. Сăр тата Хусан хỹтĕлев чиккисене тунă çĕре хастар хутшăннă 7 хĕр çинчен пырать унта сăмах. Спектакль паха енсене - кăмăл-сипет пуянлăхне, çĕршыва, çуралнă кĕтесе юратнине кăтартать.

Куракансем хĕрсен актер ăсталăхĕнчен, сцена çинче тылри хастарсен паттăрлăхне, вăрçă йывăрлăхĕсене уççăн кăтартма пултарнинчен тĕлĕнчĕç. Кашнин чĕри патнех çитрĕ спектакль.

Шкул театрĕ 2021 çулта ĕçе пуçăннă. Вăтам çулхи ачасем унта анлăн явăçнă. Коллектива Гузель Вахитова ертсе пырать.

Сцена çине çавăн пекех Патăрьелĕнчи пĕрремĕш вăтам шкулти "Арабеск" ташă тата Патăрьелĕнчи ăсталăх шкулĕнчи "Тамче" вокалпа инструментсен ансамблĕсем те тухрĕç.

Чăваш академи драма театрĕн фойинче "Çамрăк аниматорсем" мультстудин "Улăп Паттăр" мультфильмне кăтартнипе пĕрлех "Наци тумĕллĕ пукане управçă" выставка ĕçлерĕ, "Пĕрремĕшсен юхăмĕ" флеш-моб тата мастер классем кăтартрĕç.

"Çакнашкал пулăмсем çитĕнекен ăрăва регионăн культура эткерлĕхне аталантарса тата упраса пыма явăçтараççĕ. Ку енĕпе мероприятисем малашне те пулĕç. Вĕсенче ачасем хăйсен пултарулăхне кăтартĕç",- пĕтĕмлетрĕ Патăрьел муниципалитет округĕн Театр кунне хутшăннă администрацин вĕрентỹ, çамрăксен политики, физкультура тата спорт управленийĕн начальникĕ Ирина Рубцова.

Альбина ИВАНОВА