ЫРĂ ĕç сăваплă та пархатарлă çеç мар, çак утăма тăваканăн кăмăлĕ те иксĕлми. Акă, çак кунсенче çеç волонтерсен Юрий Тинюков ертсе пыракан "Батыревский доброволец" ушкăнĕ каллех инçе çула, Украинăри ятарлă çар операцине хутшăнакан ентешĕмĕрсем патне гуманитари пулăшăвне çитерме тухса кайрĕ. Хальхинче те салтаксен кăмăлне тивĕçтерекен ыйтусене татма хастарсем пĕринчен тепри кар тăнă. Пĕрисем укçа-тенкĕпе, теприсем кирлĕ таварпа, апат-çимĕçпе, ăшă тумтирпе тата ыттипе те пулăшнă. Яланхи пекех салтаксене Патăрьелĕнчи пĕрремĕш вăтам шкулти Валентина Аппакова ертсе пыракан 2б класра вĕренекенсемпе вĕсен ашшĕ-амăшĕ кучченеçсем, саламлă çырусем хатĕрленĕ. Сăкăтри Станислав Симуковăн хăйĕн утарĕнчи техĕмлĕ пылĕ те ятарлă çар операцине хутшăнакансене вăй хушĕ, округри такси службинче тăрăшакансен бензинпа ĕçлекен икĕ пăчăки те çар пурнăçĕнче кирлĕ пулĕ тата ытти те. Пирĕн тăрăхран ăсанакан гуманитари пулăшăвĕ, кунтан ăсанакан ырă та ăшă сăмахсем, саламсем салтаксене пысăк хавхалану кỹччĕрех, çĕнтерỹпе таврăнма пулăшчăрах.