Ĕнер, ноябрĕн 13-мĕшĕнче, Патăрьел муниципалитет округĕн пуçлăхĕ Рудольф Селиванов структура подразделенийĕсен, республика службисен ертỹçисемпе, территори пайĕсен начальникĕсемпе канашлу ирттернĕ. Унта иртнĕ эрнери ĕçе пĕтĕмлетнĕ, çĕнĕ тĕллевсене палăртнă.

Канашлура муниципалитет округĕнче ноябрĕн 17-мĕшĕнче иртекен ял хуçалăх тата тирпейлекен промышленноçра ĕçлекенсен уявĕпе çыхăннă ыйтусене сỹтсе явнă. Муниципалитет округĕн пуçлăхĕн çумĕ-строительство, çул-йĕр тата пурăнмалли коммуналлă хуçалăх пайĕн начальникĕ Равиль Ямалетдинов 2024 çул валли пуçару бюджечĕн проекчĕсемпе заявкăсене йышăнас вăхăт вĕçленсе пынине палăртнă. Ку таранччен конкурса 23 проект хутшăнма тăратнă.

Эрне пĕтĕмлетĕвĕнче Аслă Чемен территори пайĕн пуçлăхĕн тивĕçĕсене вăхăтлăх пурнăçлакан Екатерина Фролова тата Ыхра Çырми территори пайĕн начальникĕ Фениль Алиуллов вырăнта пурнăçланă ĕçсем пирки отчетсем тунă.

 (Хамăр корр.)