Çапла çирĕплетет Первомайскинчи культура çурчĕн директорĕ Владимир Верликов. Икĕывăлĕ Украинăри ятарлă çар операцине хутшăннăран тĕрлĕ ыйту паракансене яланах çакнашкал хурав пама тăрăшать вăл. Ашшĕ те, ачисем те чăн-чăн патриотсемех ĕнтĕ.

Владимир Николаевич культура сферинче ĕçлеме пикеннĕренпе 30 çула яхăн. Вăл Каншел клубне Федор Павлов ячĕллĕ Шупашкарти вĕренỹ учрежденийĕнче пĕлỹ пухнă хыççăн килнĕ. Ĕçе пуçăнса кайма çăмăл пулнă ăна. Çĕнĕ клуб. Хăй вăхăтĕнче вырăнти колхоз председателĕнче ĕçленĕ Михаил Петров харăсах виçĕ çĕнĕ купăс туянса панă.

Çав çулах Владимир Верликов "Çăлкуç" ансамбль йĕркелесе ярать. Пĕр вăхăтра ташă-юрă ăстисене 29 çын таранччен çитерме пултарать çамрăк специалист. Паянхи кун та хисепре ансамбль. Халăх ятне те тивĕçнĕ. Сцена çине юрăпа 60 çултан иртни те çамрăксемпе юнашарах тухать. Çывăх вăхăтра 30 çул тултарать ансамбль.

Ăçта çеç çитсе курман коллектив. Каласа та пĕтерме çук. Мускавра та, Йошкар-Олара та, Тутарстан Республикинче те, Ульяновск, Самара облаçĕсенче те... темиçешер хутчен те пулнă. Раççей тĕп хулинче "Вместе с Россией" уява хутшăннă. 1994 çулта Шупашкарта ял уявне тума мехел çитернĕ. Шупашкарта иртнĕ çул аслă çулхисемпе ветерансен халăх ăсталăхĕн фестиваль-конкурсне хутшăнса "Пирĕн çунатсем çирĕп" номинацире пĕрремĕш степеньлĕ лауреат пулнă. Нумаях пулмасть Мордва Республикинчи Ардатово районĕ 95 çул тултарнине палăртнă çĕре çул ỹкернĕ. Хамăр республика тĕп хулинче Раççейри сăра ярмарккине ирттернĕ çĕрте хăйсен пултарулăхне кăтартнă тата ытти те. Кашни çĕртенех çĕнтерỹçĕ, лауреат пулса таврăннă тесен те йăнăшмастăп пулĕ. Хисеп хучĕсене, дипломĕсене шутласа та кăларма çук.

Каншел ял уявне Питравра йĕркелессине вара Михаил Петров пуçарса янă пулнă. Ырă йăла малалла тăсăлать. Кăçал уява республикăри анатри чăвашсен фольклор ушкăнĕсене те йыхравларĕç. Фестивале йышлăн килчĕç. Вăйă картине тăчĕç. Юхрĕ вара юрă ян! та ян!

Паянхи кун территори пайĕнчи 5 клубпа культура çурчĕн ĕçне тимлесе тăрать Владимир Верликов. Кашнийĕнчех мероприятисем ирттерме тăрăшаççĕ. Хĕле хатĕрленсе пуринче те юсав ĕçĕсене пурнăçлама тăрăшнă. Первомайскипе Каншелĕнче урайĕсене сăрланă. Сителĕнче клуба кĕмелли картлаçа ял халăхĕн вăйĕпе тирпейленĕ. Анат Чакăра клуб юсас ыйтупа ĕç пырать.

Мероприятисен планĕ пур культура ĕçченĕсен. Унпа килĕшỹллĕн ăсталăх сезонне уçнă. Кашни ялтах аслă çулхисен кунне палăртнă. Вĕрентекенсене тата педагог ветерансене сума суса концертсем лартнă. Малашлăхра Аннесен кунне палăртма хатĕрленеççĕ. Вĕсене Украинăри ятарлă çар операцине хутшăнакансен çывăх çыннисене ятарласа чĕнеççĕ. Ĕçе ялан лайăхлатса пыма тăрăшаççĕ кунта. Пăлапуç Пашьелĕнчен Лилия Афанасьева хореограф эрнере икĕ хутчен килсе çỹрет. Хальлĕхе вăл культура ĕçченĕсене ташă ăсталăхне вĕрентет. Малашне ачасенчен кружок йĕркелесшĕн.

- Балалайкăпа, гитарăпа выляс ăсталăх та пуринче те çук. Алăран купăс ямастăп пулин те хамăн та вĕренмеллех. Кружок йĕркелесшĕн. Музыка инструменчĕсем пур,- тет Владимир Николаевич. - Купăс калама пĕлни, авалхи йăла-йĕркене тытса пыни кирлех. Тепĕр чухне каччăсене çар ретне салтак тивĕçне пурнăçлама ăсатма тивет. Клубсенче йĕркелетпĕр-ха ăсату каçĕсене. Уйрăлу саманчĕ йывăр пулсан та кил хапхинчен кăларса янă чухне пусарăнчăк кăмăла юрăпах уçас килет.

Ялсенчи культура вучахĕсенче çулленех купăс калакансен конкурсне йĕркеленине те асăнса хăвармалла. Çĕнтерỹçĕсем округ шайнех тухаççĕ. Сăмах май çакна палăртни те вырăнлă. Муниципалитетри ăста купăсçăсем хăйсем те республика тулашĕнчи конкурссене сахал мар хутшăнаççĕ. Вĕсен йышĕнче кашнийĕнчех Владимир Верликовпа Валерий Фролова курма пулать.

Культура ĕçченĕсен ĕçĕ халăх куçĕ умĕнче. Сителсем (заведующийĕ -Ирина Лякова) мероприятисене кăмăла каймалла ирттереççĕ. Первомайскинчи Валерий Фролов, Каншелĕнчи Наталия Ильметова, Пỹртлĕри Марина Сидорова та çак сферăра çине тăрса тăрăшаççĕ. Анат Чакăра Люба Верликова ĕçе пикеннĕ. "Телей" ансамбль йĕркеленнĕ кунта.

Ĕçне кура хисепĕ, теççĕ. Владимир Верликов пултарулăхне тивĕçлипе хакланă. 2018 çулта ăна "Чăваш Республикин культурăн тава тивĕçлĕ ĕçченĕ" ята панă. Çакă та хавхалантарать. Ĕçе чун хушнипе туса пыма ыйтать. Çакна мала хурать те музыкант, юрăç.

Альбина АСТРАХАНЦЕВА