Кĕçĕн Патăрьелĕнче пурăнакан Вера Николаена Тихонова 100 çул тултарнă. Юбилее вăл çывăх çыннисемпе тăванĕсен хушшинче кĕтсе илчĕ. Çак ятпа Тăван çĕршывăн Аслă вăрçин ветеранне Патăрьел муниципалитет округĕн пуçлăхĕ Рудольф Селиванов, Патăрьел тата Шăмăршă районĕсен çар комиссарĕ Вячеслав Илюткин, Тăрăн территори пайĕн начальникĕ Николай Рубцов саламларĕç.

Вера Николаевнăна хисеп тума Челябинск хулинчен иккĕмĕш сыпăкри тăванĕ Александр Тихонов та килнĕ. Александр Павлович аслă çулхи çынсем, вăрçă ветеранĕсем патне çакнашкал тимлĕх уйăрнăшăн тав турĕ.

Вера Николаевна фронта 1942 çулхи декабрь уйăхĕнче кайнă. 1770-мĕш артиллери полкĕн ХI батальонăн рядовойĕ пулса çапăçнă. Мускава хỹтĕлеме хутшăннă. Фронтран 1945 çулхи июнь уйăхĕнче таврăннă. Малтанхи вăхăтра лавккара ĕçленĕ. Мĕн тивĕçлĕ канăва тухичченех Патăрьелĕнчи ДЭУра тăрăшнă. "Мускава хỹтĕленĕшĕн", "Германие çĕнтернĕшĕн" медальсене тивĕçнĕ.

Альбина ИВАНОВА

Пĕлме

Паянхи кун Патăрьел муниципалитет округĕнче Тăван çĕршывăн Аслă вăрçин 3 ветеранĕ пурăнать: Вера Николаевна Тихонова (Кĕçĕн Патăрьел), Нурулла Велиуллович Резепов (Шăнкăртам), Феоктист Александрович Васильев (Шăхач).