Чăваш Енре профессиллĕ сăнарлă ỹнер (искусство) пуçланнăранпа 111 çул çитнине халалласа республикăри художниксенчен академи пĕлĕвĕ илнĕ пĕрремĕш çын - Алексей Афанасьевич Кокель - çуралнă тăрăхра - Турханта - уяв мероприятийĕ иртнĕ.

Ăна республикăри Халăхсен ассамблейи, Чăваш патшалăх культура тата искусство институчĕн халăх художество ăсталăхĕн кафедри, Витебскри П. Машеров ячĕллĕ университетăн художествăпа графика факультечĕ, Турханти вăтам шкул йĕркеленĕ. Мероприяти Чăваш Енри наци ỹнер ăсталăхне пуçарса яракан Алексей Кокель музей-çурчĕ умĕнче уçăлнă. Вырăнти территори пайĕн начальникĕ Александр Еремеев уява хутшăнакансене Патăрьел муниципалитет округĕн пуçлăхĕн Рудольф Селивановăн саламне вуласа панă.

Республикăри Халăхсен ассамблейин председателĕн Леонид Черкесовăн саламне унăн çумĕ, культурологи докторĕ, Чăваш патшалăх культура тата искусство институчĕн профессорĕ Владимир Васильев çитернĕ.

Турханти культура çурчĕн заведующийĕ Александра Ершова Ассамблейăн Хисеп хутне тивĕçнĕ.

Мероприятие хутшăнакансем Алексей Кокель палăкĕ умне чечек хунă, музей-çурчĕпе паллашнă. Çавăн пекех анатри чăваш хресченĕн ХIХ ĕмĕр вĕçĕпе ХХ ĕмĕр пуçламăшĕнчи этно-культурин уйрăмлăхĕсене тишкернĕ.

Турханти вăтам шкулта онлайн мелĕпе "Пирĕн пурнăçри Алексей Кокель ăсталăхĕн пĕлтерĕшĕ" темăпа çавра сĕтел йĕркеленĕ. Малтанах Виктор Чугаровăн "Профессиллĕ пĕрремĕш чăваш ỹнер- çин, Алексей Афанасьевич Кокель профессор çĕршывĕнче" документлă фильм пăхнă. Çавра сĕтел калаçăвне Владимир Васильев, Витебск художникĕ, педагог, XVI Кокель пленэрне хутшăннă Александр Алавердиев, ỹнерçĕ, педагог, XVI Кокель пленэрне хутшăннă Тюмень хулинчи Александр Васильев тата Хабаровск крайĕнчи Амур çинчи Комсомольск хулинчи Кокель пленэрĕсене хутшăннă Ирина Кочергина ỹнерçĕ явăçнă.

Медицина наукисен докторĕ Владимир Родионов профессор, Чăваш Республикин тава тивĕçлĕ учителĕ Валентин Сергеев, Чăваш Енри кинематографистсен канашĕн председателĕ, "Асам" кинофестиваль ертỹçи Олег Цыпленков, çавра сĕтел калаçăвне хутшăннисем Алексей Кокель пултарулăхĕпе культура эткерлĕхне вĕренни Хĕвеланăç вырăс культурине ура хурса пынă чухне уйрăмах вырăнлă пулнине палăртнă.

Альбина КАПИТОНОВА