КĔР мăнтăрĕпе Кивĕ Ахпỹртсем пĕр шухăшлăн шкул çумĕнче капăр часовня туса лартрĕç, унăн таврашне хăтлăх кĕртрĕç. Паян унтан кăнтăрла та, каçхине те иртсе кайма кăмăллă. Пĕрлехи сăваплă ĕçĕн сумĕ те пысăк. Пархатарлă шухăша пурнăçа кĕртме çак ялсем укçа-тенкĕ те чылай пуçтарнă. Патăрьел мунициалитет округĕнчи депутатсен Пухăвĕн депутачĕ Анатолий Каргин ял хăтлăхĕшĕн 100 пин тенкĕ панă. Анатолий Антонович Украинăри ятарлă çар операцинчи салтаксем патне волонтерсем урлă час-часах кучченеçсем те ăсатать. Çак кунсенче çеç ентешсем вăл парса янă 20 литр пылшăн, ăшă перчеткесемшĕн, лаша какайĕнчен хатĕрленĕ кăлпассишĕн тата ыттишĕн те чун-чĕререн тав тунă, тăван ял-йыш ăшă сăмахпа, ырă ĕçпе хавхалантарса тăни çĕнтерĕве çывхартма пулăшнине пĕлтернĕ.