Мускаври ВДНХра Халăх пĕрлĕхĕн кунĕнче "Раççей" курав-форум уçăлчĕ. Вăл апрелĕн 12-мĕшĕччен ĕçлĕ. Çак тапхăрта Раççейри регионсем хăйсен культурипе, экономикипе, тĕрлĕ сферăра пурнăçланакан проекчĕсемпе паллаштарĕç.

 Чăваш Республики çинчен каласа паракан стенд 75-мĕш павильонта вырнаçнă. Тĕп арт объект - пысăк тухья. Унăн ăшĕнче виртуаллă тĕнче вырнаçнă. Чăваш Енĕн илемĕпе пуянлăхĕ, аталанăвĕ çинчен виçĕ иммерсивлă (хăйне евĕрлĕ) зона паллаштарать.

Аса илтеретпĕр, Чăваш Республикин кунĕ декабрĕн 1-мĕшĕнче иртĕ. Çак кун Раççей Федерацийĕн Патшалăх Думин туризмпа туристсен инфратытăмне аталантарас тĕлĕшпе тимлекен комитечĕ "Раççейре автотуризма аталантарасси: Чăваш Республики тата Атăлçи тăрăхĕн регионĕсем пилотлă проекта пурнăçа кĕртмелли регионсем" темăпа 2035 çулчченхи туризм аталанăвне халалласа çавра сĕтел йĕркелĕ. Çавăн пекех "Аслă Атăл тракчĕ" проекта пурнăçа кĕртес пирки килĕшỹ те çырма палăртнă. Чăваш туйĕ хăнасене савăнтарнипе пĕрлех наци апат-çимĕçне хатĕрлес тĕлĕшпе мастер-классем иртĕç.

 Çак кунсенче Патăрьел муниципалитет округĕнчи "Движение Первых" ачасемпе çамрăксен обществăпа патшалăх юхăмĕн ĕçне йĕркелес енĕпе ĕçлекен специалисчĕ Зоя Михайлова ертсе пынипе Юхмапа Пăла тăрăхĕнчи пултаруллă яш-кĕрĕм "Раççей" курав-форума çитсе курнă, тăван республикăна халалланă 75-мĕш павильонпа паллашнă.

Александр ИВАНОВ