Чăннипех, пирĕн аннесем ылттăнран та хаклăрах, кĕмĕлтен те сумлăрах. Вĕсем çут тĕнчери хĕвелрен те ăшăрах, чи çÿлти çăлтăртан та çутăрах.

Сителте пурăнакан çывăх çыннăмăрсем çакна тепĕр хутчен çирĕплетсе пачĕç. Шăпах çак кун Оксана Хомуткина библиотекарь тата Ирина Лякова культорганизатор йĕркеленипе ялти клубра «Чи лайăх анне» шоу-конкурс иртрĕ. Ăна пире пурнăç парнеленĕ çыннăмăрсен уявне халалларĕç.

Унта хутшăнма хапăл тунă аннесем хăйсен пултарулăхĕпе савăнтарчĕç. Тĕрлĕ конкурсра, чăннипех, пурте маттуртан та маттур пулнипе тĕлĕнтерчĕç. Çакна курма килнисем пĕр чарăнмасăр тăвăллăн алă çупни те тÿрреммĕнех çирĕплетет.

Тупăшу питĕ хĕрÿ иртнĕрен тÿресене пĕтĕмлетÿ тума та йывăр пулчĕ. Çапла вара çак конкурсра тăватă анне тăватă номинацире çĕнтерÿçĕсем пулса тăчĕç. Нина Соколова «Сăпайлă анне», Лидия Васильева «Хастар анне», Светлана Макарова «Ăста анне» ятсене çĕнсе илчĕç. «Чи лайăх анне -2023» хисепе вара Светлана Васильева алран вĕçертмерĕ.

Конкурссем хушшинче кăсăклă та савăк юрă-ташăсемпе ялти пултаруллă хĕрарăмсен ушкăнĕ, шкул ачисем, Сителти культура ĕçченĕсем савăнтарчĕç. Çавăн пекех кÿршĕ ялтан килнĕ Ольга Кутузова Аннесен кунĕ ячĕпе юрă шăрантарчĕ.

Курма килнисене, аннесене ялти Хĕрарăмсен канашĕн ертÿçи Оксана Хомуткина, Юрий Степанов староста саламласа конкурсанткёсене парнесемпе чысларĕç.

            Ирина Мамуткина