Сашăна асра тытса

 Шăхачри культура çуртĕнче Украинăри ятарлă çар операцине хутшăннă, Паттăрлăх орденне вилнĕ хыççăн тивĕçнĕ Александр Тимайкин ячĕпе шашкăлла выляссипе уçă турнир иртнĕ.

Ăмăртăва хутшăнакансене Патăрьел муниципалитет округĕн пуçлăхĕн пĕрремĕш çумĕ, администрацин хăтлăх кĕртессипе территори аталанăвĕн управленийĕн начальникĕ Анисия Воробьева саламланă.

Александр Тимайкин Шăхач ялĕнче çуралса ỹснĕ. 2016 çулта Аслă Чемен вăтам шкулĕнчен вĕренсе тухнă. 2021 çулччен Илья Ульянов ячĕллĕ Чăваш патшалăх университечĕн юридика факультетĕнче пĕлỹ пухнă. Çав çулах çар ретне тăнă. Контракт мелĕпе хăй тĕллĕн çỹрекен гаубица артиллери дивизионĕн артиллери взводĕнче тăнă. 2022 çулхи мартăн 10-мĕшĕнче вилнĕ.

Кĕрешỹçĕ ăсталăхпа палăрнă

Ульяновск хулинче Раççей тава тивĕçлĕ спорт мастерне, икĕ хутчен тĕнче тата Европа чемпионне Шамиль Садриева асра тытса Атăлçи кубокне çĕнсе илессишĕн арçын ачасем хушшинче ирĕклĕ майпа кĕрешекенсен турнирĕ иртнĕ. Унта тĕрлĕ регионтан 150 ытла спортсмен хутшăннă. Вĕсем 10 виçе категорийĕпе кĕрешнĕ. Пĕтĕмĕшле очки пĕрлештернĕ командăн пухмачне кайнă.

"Паттăр" спорт шкулĕн воспитанникĕ Игорь Рябчиков 48 килограмлă виçере çĕнтерỹçĕ пулнă. Унăн тренерĕ Вячеслав Спиридонов çамрăк çитĕнĕвĕпе савăннă май Игорь пысăк маçтăрлăх, чăтăмлăх кăтартнине палăртнă.

Çĕнĕ Шупашкартан - çитĕнỹпе

Совет Союзĕн Геройне Н. Дудецкие асра тытса Çĕнĕ Шупашкарти олимп резервĕсен виççĕмĕш спорт шкулĕнче йăлана кĕнĕ ăмăрту иртнĕ. Пьедесталăн пĕрремĕш картлашки çине Первомайски вăтам шкулĕнчи Валерия Гаврилова (400 метр), Пăлапуç Пашьел вăтам шкулĕнчи Илья Макаров (2000 метр чăрмавсемпе), иккĕмĕшне Первомайски вăтам шкулĕнчи Кристина Иванова (1500 метр), Пăлапуç Пашьел вăтам шкулĕнчи Анастасия Бахитова (60 метр хỹмесем урлă сиксе каçса), виççĕмĕшне Первомайски вăтам шкулĕнчи Филипп Сидоров (2000 метр) тăнă. Пĕрремĕш вырăншăн - пĕрремĕш разряд Канаш хулинчи "Локомотив" ФСКара ФСБ подполковникне Р. Желудкина асра тытса кире спорчĕн уçă чемпионачĕ иртнĕ. Унта "Паттăр" спорт шкулĕн воспитанникĕсем те хутшăннă. 2009 çулта çуралнисенчен тата кĕçĕнреххисенчен 63 килограмлă виçепе Карина Плечовапа Аделина Краснова пĕрремĕш вырăнсене йышăнса пĕрремĕш разряд нормативне тултарнă. Лиана Назарова вара - виççĕмĕш вырăнта. Арçын ачасенчен 2007 çулта çуралнисенчен тата кĕçĕнреххисенчен Тимур Таютовпа Арсений Сулагаев виççĕмĕш вырăн йышăннă

Çамрăксене ăмăртусене Алексей Алексеевпа Виталий Глинкин тренерсем хатĕрленĕ.

Пухмача медальсемпе пуянлатнă

Иван Яковлев ячĕллĕ Чăваш патшалăх педагогика университечĕн бассейнĕнче 2005-2018 çулсенче çуралнă ачасем хушшинче йăлана кĕнĕ "Çамрăк ишевçĕ" ăмăрту иртнĕ. Кăçалхине Шупашкар, Канаш, Çĕрпỹ, Çĕнĕ Шупашкар хулисенчен, Канаш, Элĕк, Патăрьел тата Шăмăршă муниципалитет округĕсенчен 300 ача хутшăннă.

Ăмăрту икĕ куна пынă. "Паттăр" спорт шкулĕн воспитанникĕсем 11 ылтăн, 10 пăхăр, 10 кĕмĕл медаль çĕнсе илнĕ.

 Валерий Платоновпа Светлана Рубцова çамрăксене шывра ишме тăрăшса хатĕрлени куç кĕретех.

Альбина ИВАНОВА