ЮЛАШКИ вăхăтра Украинăри ятарлă çар операцине хутшăнакан салтаксем ырă туйăмпа Патăрьелĕнчи волонтерсем, тĕрлĕ майпа пулăшу кỹрекенсем патне çине-çинех тав сăмахĕ çитереççĕ. Ыр кăмăллăхпа салтаксене хавхалантаракансем, çĕнтерĕве çывхартма пулăшакансем йышлансах пыни кăмăллă. Пĕрле чухне мĕн пур йывăрлăха парăнтарма пулать! Юрий Тинюков волонтерсен ушкăнĕ йĕркелесе пыракан пархатарлă ĕçе кашнийĕнчех кар тăрса хутшăнаççĕ. Вăл шутра уйрăм çынсем, предпринимательсем, фермерсем, ытти коллективсем те салтаксене çар пурнăçĕнче кирлĕ япаласемпе вăхăтра тивĕçтерме тăрăшаççĕ. Апат-çимĕç, ăшă тумтир, автомашинăсене кирлĕ юсав хатĕрĕсем, урапасем, электропăчăкă, пыл, мунча кăмакипе милĕк таранах илсе çитереççĕ. Салтаксен чунне ăшăтакан чи ăшă та хĕрỹллĕ салам та яланах пĕрле çỹрет.