Ĕнер Патăрьел муниципалитет округĕн ларусем ирттермелли Пысăк залĕнче анлă лару иртрĕ. Унăн ĕçне территори пайĕсен начальникĕсем, муниципалитет округĕн администрацийĕн структура подразделенийĕсен, организаци-предприяти, мĕн пур харпăрлăх формиллĕ учреждени ертỹçисем хутшăнчĕç. Анлă ларăва Патăрьел муниципалитет округĕн пуçлăхĕ Рудольф Селиванов ертсе пычĕ.

Кун йĕркине кĕртнĕ ыйтусем кашниех пĕлтерĕшлĕ. Декабрĕн 1-мĕшĕнче çĕр, транспорт, ытти пурлăхшăн налук тỹлемелли вăхăт иртрĕ. Çавна май анлă ларура РФ налук службин управленийĕн Чăваш Республикинчи Комсомольски подразделенийĕн тĕп патшалăх налук инспекторĕ Геннадий Филиппов 2022 çулта Юхмапа Пăла тăрăхĕнчи çынсем налука мĕнле тỹленипе паллаштарчĕ. Геннадий Николаевич иртнĕ çулхипе танлаштарсан плана 106 процент пурнăçланине палăртрĕ. Транспортпа налук пухассине 104, уйрăм çынсенчен налук пухассине 101, çĕршĕн 105 процент пурнăçланă. Апла пулин те ку тĕлĕшпе вырăнти территори пайĕсемпе ĕçлемелли чылай пулнине те палăртрĕ. Налукран темиçешер çул та пăрăнса çỹрекен те нумай-ха. Пĕр парăмçăн çеç ултă миллион тенкĕ ытла пуçтарăнса кайнă.

 Юлашки çулсенче Патăрьел муниципалитет округĕнчи территори пайĕсенче хăйсен харпăр хăй ĕçне уçса патшалăх пулăшăвĕпе усă куракан граждансем йышлансах пыраççĕ. Вĕсем хушшинче çамрăксем те, аслăрах çулхисем те пур. РФ Социаллă фондăн Чăваш Енри уйрăмĕн Патăрьел муниципалитет округĕнчи клиент службин начальникĕ Дмитрий Федоськин харпăр ĕçне уçнисен пенси прави пирки тĕплĕн ăнлантарчĕ.

Анлă ларури тепĕр ыйту - Патăрьелĕнчи нумай хваттерлĕ çуртсене пăхса тăракан "Чистое село" компанин лицензийĕ тухнăран уçă конкурспа çĕнтернĕ "Управляющая компания "Управление МКД" тулли мар яваплă пĕрлешĕвĕн умра тăракан тĕллевĕсем, çуртсене пăхса тăракан (79 çурт) яваплă организацийĕн çăмăллăх тарифĕсемпе Патăрьел муниципалитет округĕн пуçлăхĕн пĕрремĕш çумĕ-хăтлăх кĕртессипе территорисен аталанăвĕн управленийĕн начальникĕ Анисия Воробьева паллаштарчĕ.

Умра - кашни çын çутă ĕмĕт-шанăçпа кĕтекен Çĕнĕ çул. Ырă йăлана малалла тăсса Юхмапа Пăла тăрăхĕнче ноябрĕн 27 - декабрĕн -22-мĕшĕсенче "Хĕллехи асамлăх" конкурс йĕркелеççĕ. Патăрьел муниципалитет округĕн пуçлăхĕн пĕрремĕш çумĕ-хăтлăх кĕртессипе территорисен аталанăвĕн управленийĕн начальникĕ Анисия Воробьева тата Патăрьел территори пайĕн начальникĕ Николай Ялуков конкурс йĕркипе паллаштарчĕç. Çак ыйтăва Патăрьел муниципалитет округĕн пуçлăхĕ Рудольф Селиванов та çивĕчлетрĕ, конкурса округ центрĕ çеç мар, кашни территори пайĕ хастар хутшăнмаллине палăртрĕ.

Альбина ЕГОРОВА