ПРАВОСЛАВИ тĕн йăли-йĕркине тытса пыракансемшĕн ноябрĕн 28-мĕшĕнче Раштав типпи пуçланчĕ. Вăл 40 куна пырать, 2024 çулхи январĕн 6-мĕшĕччен тăсăлать. Çак тапхăрта Турра ĕненекенсем чиркỹсене çỹреççĕ, типĕ тытса, çылăхсемшĕн ỹкĕнсе чунĕсене усал шухăшран тасатаççĕ. Типĕ вăхăтĕнче çуллă апат-çимĕçрен, эрех-сăраран, шавлă ушкăнсенчен, киревсĕр ĕçсенчен пăрăнма тăрăшмалла. Ун вырăнне çынна ырă туни, сăпайлă пулни, ăш сăмахпа, ĕçпе пĕр-пĕрне пулăшни, ирхине те каçпа кĕлĕ вулани пуриншĕн те сăваплă пулĕ. Сăмахран, çак тапхăрта Украинăри ятарлă çар операцинчи салтаксем валли гуманитари пулăшăвне хастартарах хутшăнни, вĕсемшĕн кĕл туни пархатарлă ĕç.