- Эпир иккĕмĕш çул Пĕтĕм Раççейри "Ялти чи лайăх ăсталăх шкулĕ" конкурса хутшăнтăмăр. Хамăр ĕç-хĕле çутатса республикăра мала тухрăмăр. Унтан федерацин Атăлçи округĕнче сумлă вырăн çĕнсе илтĕмĕр.

Ĕçлемесĕр, тăрăшмасăр çитĕнỹ тума çук. Çанă тавăрса вăй хумалăх мĕн пур услови çителĕклĕ пирĕн. Çуртăмăра çĕнетнĕ, çутă, таса, тирпейлĕ. Муниципалитет округĕн, республика шайĕнчи конкурссемпе фестивальсене хутшăнма та вăй-халăмăр пурах,- тет Патăрьелĕнчи ачасен ăсталăх шкулĕн директорĕ Алина Антонова. Чăнах та çапла. Кунта пĕлỹ пухакансем мероприятисенче те хăйсен пултарулăхне тăтăш кăтартаççĕ. Вĕсемсĕр сахал концерт иртет тесен те тĕрĕсех пулĕ. Çитĕнекен ăру юрăпа, ташăпа тухать халăх умне. Выставкăсем йĕркелеççĕ. Семинарсем, конференцисем ирттерни те кăмăллă.

Ачасене хушма пĕлỹ парасси çине тимлĕх уйăрма кирлине "Вĕрентỹ" наци проектĕнче те палăртнă. Паянхи кун, е 2023-2024 вĕренỹ çулĕнче 520 çамрăк ăс пухать ăсталăх шкулĕпе унăн филиалĕсенче. Вĕсенчен 320-шĕ 12 программăпа (музыка, хореографи, ỹкерес ăсталăх, фортепиано, халăх инструменчĕсем...), професси суйласа илме май паракан занятисене çỹреççĕ. 200-шĕ 13 программăпа (музыка, театр, хореографи...) пĕтĕмĕшле аталану çул-йĕрĕ çине тăнă.

Шкулта 5 уйрăм - музыка, художество, хореографи, театр тата эстетика - ĕçлеççĕ.

19 ăста преподаватель тăрăшать кунта. Вĕсенчен 17-шĕ - аслă пĕлỹллĕ, 6-шĕ - аслă категориллĕ. Çак кунсенче тата иккĕшĕ категорие ỹстермелли тĕрĕслевре пулчĕç. Мидхать Шакиров Раççей Федерацийĕн тата Чăваш Республикин, Владимир Ширтанов Чăваш Республикин культурăн тава тивĕçлĕ ĕçченĕсем, Валентин Сергеев Чăваш Республикин тава тивĕçлĕ учителĕ ятсене тивĕçнĕ. Çавăн пекех Галина Рубцова, Вероника Макарова, Анастасия Носкова, Мидхать Шакиров, Елена Мишина, Владимир Ширтанов, Тамара Федоськина тата ыттисем те пысăк ĕç стажĕллĕ. Преподавательсенчен чи асли 77-ре, кĕçĕнни 25 çулта. Ăста вĕрентекенсем çамрăксене професси вăрттăнлăхĕсене парса пыраççĕ. Вĕсене мастер-классем ирттерме явăçтараççĕ. Пĕчĕкрех стажлисем квалификацие ỹстермелли курссенче пулаççĕ. Тĕрлĕ акцие явăçаççĕ, проектсене хутшăнаççĕ.

Анастасия Носкова, Алина Купкенова, Радия Чуварова преподавательсем хăйсем те вăхăтĕнче çакăнти ăсталăх шкулне çỹренĕ. Çамрăксем ĕçлеме кунта килни те кăмăллă. Виççĕшĕ те халĕ Чăваш Республикин Пуçлăхĕн стипендине тивĕçнĕ.

Ăсталăх шкулне муниципалитет округĕн аякри ялĕсенчен пĕлỹ илме çỹрени кăмăллă. Туçаран та, Хирти Пикшикрен те, Упамсаран та, Нăрваш Шăхалĕнчен те... занятисене пĕр сиктермесĕр килеççĕ. Çакăнта туптанă пĕлỹ вĕсене малашлăх пурнăçра кирлине туяççĕ.

Вĕренекенсем хăйсен ăсталăхне аталантарма майсем тупаççĕ.Теприсем Турханти (преподавателĕ Валентин Сергеев), Çĕньялти (Алина Антонова), Шăнкăртамри (Альбина Абитова), Сăкăтри (Владимир Горбунов), Тутар Сăкăтĕнчи (Лилия Хасянова), Патăрьелĕнчи пĕрремĕш тата иккĕмĕш вăтам шкулсенчи (Татьяна Толстовăпа Татьяна Овечкина) структура подразделенийĕсене çул тупнă. Вĕрентекенсен ăсталăхне пула "Радуга" вокалпа эстрада, "Балаган", "Тамчы" халăх инструменчĕсен, "Созвездие" инструментсен, "Звуки детства", "До-ре-ми", "Акварель" хор, "Задоринки", "Звездочки" фольклор ансамбльсем, "Айхи ачисем" театр студийĕ, "Евгения", "Арабеск" хореографи коллективĕсем ăнăçлă ĕçлесе пыраççĕ.

Вĕренекенсем тĕнче, Раççей, регион, муниципалитет шайĕнче лауреатсем пулаççĕ, дипломсене тивĕçеççĕ. Паян ăсталăх шкулĕн выпускникĕ Денис Павлов ытти чăваш эстрада юрăçисемпе пĕрле сцена çине тухни савăнтарать. Мефодий Галкин музыка училищи хыççăн Илья Ульянов ячĕллĕ Чăваш патшалăх университетĕнче пĕлỹ пухать. Ксения Митта Чулхулари консерваторине çитнĕ. Ỹнер ăсталăхне илнисем дизайнер пулма ĕмĕтленеççĕ. Адиля Валитова Шупашкарти строительство тата хула хуçалăх техникумĕнче, Ульяна Григорьева, Арина Сурнаева, Рузия Дигашева художество училищинче тата Иван Яковлев ячĕллĕ Чăваш патшалăх педагогика университетĕнче вĕренеççĕ.

Кашни ачан хăш енĕпе те пулсан туртăм пур. Ăна тупма, аталантарса пыма çеç пĕлмелле. Ку тĕлĕшпе ăсталăх çурчĕн вĕрентекенĕсем çине тăрса ĕçлеççĕ.

Альбина АСТРАХАНЦЕВА