Декабрĕн 8-мĕшĕнче Патăрьел муниципалитет округĕн ларусем ирттермелли Пысăк залĕнче депутатсен Пухă-вĕн 21-мĕш ларăвĕ иртрĕ.

Унăн ĕçне Патăрьел районĕн прокурорĕ Андрей Афанасьев, муниципалитет округĕн администрацийĕн структура подразделенийĕсен ертỹçисем, территори пайĕсен начальникĕсем хутшăнчĕç.

Ларăва Патăрьел муниципалитет округĕнчи депутатсен Пухăвĕн председателĕ Николай Тинюков ертсе пычĕ.

 Депутатсем кун йĕркинче вунă ыйту пăхса тухрĕç. Чăн малтанах Патăрьел муниципалитет округĕн администрацийĕн право тата кадр ĕçĕсен пайĕн начальникĕ Наталия Каргина Патăрьел муниципалитет округĕн Уставне улшăнусем кĕртес тата депутатсен Пухăвĕн хăш-пĕр йышăнăвĕ вăйне çухатнă пирки тухса каларĕ.

Виççĕмĕш ыйтупа депутатсем виçĕ çуллăха тĕп финанс документне пăхса тухса пурте пĕр саслăн йышăнчĕç. Патăрьел муниципалитет округне пур енлĕн аталанма 2024 çул тата планпа пăхнă 2025 тата 2026 çулсем валли пăхнă бюджетпа Патăрьел муниципалитет округĕн пуçлăхĕн социаллă ыйтусемпе тимлекен çумĕ-финанс пайĕн начальникĕ Светлана Чернова паллаштарчĕ. Светлана Алексеевна хăйĕн сăмахĕнче малашнехи виçĕ çулта та бюджет политики муниципалитет округĕн инфратытăмне, кашни сферăна туллин аталантарас, наци проекчĕсене пурнăçа кĕртес, пуçару бюджечĕпе тухăçлă усă курас тĕллевпе ĕçленине палăртрĕ. Çавна май муниципалитет округĕн хыснине тупăш кĕртмелли мелсемпе туллин усă курмаллине те асăнчĕ. ("Авангард" хаçатăн ноябрĕн 24-мĕшĕнче пичетленсе тухнă номерĕнче виçĕ çулхи бюджет проекчĕпе туллин паллашма пулать).

Депутатсен Пухăвĕн ларăвĕнче Патăрьел муниципалитет округĕн администрацийĕн экономика, ял хуçалăх тата инвестици ĕç-хĕлĕн пай пуçлăхĕн çумĕ Андрей Воробьев Патăрьел муниципалитет округĕнче 2024 çулта муниципаллă пурлăха приватизацилемелли прогноз планĕ тата 2025-2026 çулсенче муниципаллă пурлăха приватизацилемелли тĕп енсем, çавăн пекех Патăрьел муниципалитет округĕн муниципаллă харпăрлăхĕнчен газпа тивĕçтерекен объектсене тата çĕр участокĕсене Чăваш Республикин харпăрлăхне яланлăхах парас ыйтусемпе, Патăрьел муниципалитет округĕнпуçлăхĕн çумĕ-строительство, çул-йĕр тата çурт-йĕрпе коммуналлă хуçалăх пайĕн начальникĕ Равиль Ямалетдинов çурт-йĕр фончĕпе çыхăннă ыйтупа тухса каларĕç.

 Кашни ыйтупах депутатсем тивĕçлĕ йышăну турĕç.

Альбина НИКОЛАЕВА