ЗАГС органĕсен ĕçченĕсен кунне уявланă май Патăрьел муниципалитет округĕн Çырăнтару керменĕнче çур ĕмĕр пĕрле пурăнакан мăшăрсене чысларĕç. Ылтăн туй. Аслисен пилĕпе пурăнса çак хушăра вĕсем çемье йăла-йĕркине тытса пынă, ача-пăча çуратса ỹстернĕ, çурт çĕкленĕ, йывăç лартнă...

 Юбилярсен Хисеплĕ кĕнеки çине малтанах Шăнкăртамри Альберт Алиулловичпа Гелиня Хайертдиновна Ртыкаевсем алă пусрĕç. Иккĕшĕ те çак ялтах ỹссе çитĕннĕ вĕсем. Альберт сакăр класс вĕреннĕ хыççăн тăван "Байрак" колхозра ĕçе пикеннĕ. Кирек ăçта та хастарлăхпа палăрнă.

Гелиня алла аттестат илнĕ хыççăн Патăрьелĕнчи райпотребсоюза сутуçăна вырнаçнă. Повара вĕренсе тухсан вара обществăлла апатлану предприятине кондитера куçнă. Тăрăшуллă ĕç аслă кондитера çитме май панă. Ĕç ветеранĕ ятне тивĕçнĕ.

Килĕшỹллĕ мăшăр 4 хĕрпе пĕр ывăл çуратса ỹстернĕ. Гелюся - аслă пĕлỹллĕскер, предприниматель. Мăшăрĕпе икĕ ача çитĕнтереççĕ. Лилия вара амăшĕн профессине килĕштернĕ. Вĕсен виçĕ ача. Диля сĕт заводĕнче ĕçлет. Ăрăва малалла тăсакан 5 ача ỹсет вĕсен. Ывăлĕ те çемьеллĕ пулнă. Ртыкаевсем йăхне тата унăн икĕ ачи тăсать.

Халĕ Альберт Алиулловичпа Гелиня Хайертдиновна иккĕшех пурăнаççĕ. Ачисемпе мăнукĕсене кăмăлтан кĕтсе илеççĕ. Выльăх-чĕрлĕх тытаççĕ, пахчара ĕçлеççĕ.

Валерий Васильевичпа Зинаида Александровна Руссовсем - Туçа ялĕнчен. Пĕр-пĕрне ачаранах пĕлнĕ вĕсем. Комсомол пухăвĕ хыççăн куç хывнă каччă хĕре. Виçĕ уйăхран çемье çавăрнă. Валерий 8 класс вĕреннĕ хыççăн Канашри ДОСААФра водитель правине илнĕ. Çар ретĕнчен таврăнсан "Гвардеец" колхозра водитель пулса ĕçленĕ. Каярахпа Туçари участок больницине куçнă. Мĕн тивĕçлĕ канăва тухичченех çакăнта автомашина рульне çавăрнă. "ХI-мĕш пилĕкçуллăх ударникĕ" паллă та пур унăн. "1988-1989 çулсенче "Гвардеец" колхозăн чи лайăх водителĕ" ята тивĕçнĕ. Коллективра пурте хисепленĕ ăна.

Зинаида Шупашкарти кооператив училищинчен вĕренсе тухнă хыççăн Патăрьелĕнчи райпо системине кĕрекен лавккара сутуçăра, кайран мĕн тивĕçлĕ канăва тухичченех заведующинче ĕçленĕ. Мăшăрсем иккĕшĕ те - ĕç ветеранĕ.

Ăрăва малалла тăсаканĕсем те маттур Руссовсен. Алена хĕрĕ Тикеше качча тухнă. РФ социаллă фондăн Чăваш Енри уйрăмĕн Патăрьел округĕнчи клиент службин тĕп специалист-экспертĕнче ĕçлет. Тольяттинче тĕпленнĕ Эдик ывăлĕн виçĕ ача çитĕнет. Татьянăпа Иван Шупашкарта пурăнаççĕ. Яваплă вырăнсенче вăй хураççĕ. Асламăшпе аслашшĕне, кукамăшпе кукашшĕне мăнуксемпе савăнтараççĕ.

 Патăрьелĕнчи Владимир Александровичпа Лидия Ефимовна Егоровсем те пĕр-пĕрне юратни, хисеплени, пĕр-пĕриншĕн тăрăшни çемьеллĕ пурнăçа пĕр тикĕс илсе пыма пулăшнине çирĕплетеççĕ. Иккĕшĕ те Тикешре çуралса ỹснĕ вĕсем. Владимир сакăр класс вĕреннĕ хыççăн шахтер пулас ĕмĕтпе Луганска кайнă. Каялла таврăнсан вара Патăрьелĕнчи юсавпа строительство участокне, каярахпа улма-çырла питомникне водителе вырнаçнă. Хăйне пур енчен те лайăххипе çеç кăтартнă.

Лидия вăтам шкул хыççăн Хусанти учетпа кредит техникумне çул тытнă. Алла диплом илнĕ специалист Волгоград облаçĕнчи "Первое мая" совхозра бухгалтерта ĕçлеме пикеннĕ. Каярахпа Патăрьелĕнчи Перекет банкĕн уйрăмне бухгалтера вырнаçнă. Ĕçленĕ май вĕренсе аслă пĕлỹ илнĕ. Банк системинчен уйрăлман вара. Тĕп бухгалтер çумĕнче, тĕп бухгалтерта вăй хунă. 1998 çултан "Россельхозбанк" пĕрлешĕвĕн Чăваш регионĕнчи филиалĕн Патăрьелĕнчи хушма офисĕн управляющийĕнче ĕçленĕ. Банк системинчи ĕç стажĕ те 40 çула яхăн унăн. Йĕркелĕхпе, сăпайлăхпа, интеллигентлăхпа палăрнă вăл. Коллективра, клиентсем хушшинче хисепе тивĕçнĕ.

Лидия Ефимовнăна тăрăшуллă ĕçшĕн, агропромышленность комплексĕн предприятийĕсене тивĕçтерес ĕçе тирпейлĕ туса пынăшăн Раççей Федерацийĕн тата Чăваш Республикин ял хуçалăх министерствисен, Патăрьел район администрацийĕн Хисеп грамотисемпе наградăланă.

Мăшăр икĕ ача çитĕнтернĕ. Оксана Шупашкарти "Промтрактор" заводĕнче, Оля "Россельхозбанк" пĕрлешĕвĕн Чăваш регионĕнчи филиалĕнче тĕп экономистра ĕçлеççĕ. Иккĕшĕ те аслă пĕлỹллĕ, çемьеллĕ, 4 ача çитĕнтереççĕ.

Егоровсен çемйи çамрăк ăрушăн кăтартуллă.

Юратупа килĕшỹ хуçаланать вĕсен. Çур ĕмĕр пĕрле пурăнакан мăшăрсене муниципалитет округĕн пуçлăхĕ ячĕпе администрацин культура, туризм тата информаци тивĕçтерĕвĕн пайĕн начальникĕ Наталия Никитина, ЗАГС уйрăмĕн начальникĕ Наталия Емелина, территори пайĕсен специалисчĕсем, ачисем, çывăх çыннисем, Тикешри "Хĕлхем" фольклор ушкăнĕн артисчĕсем, Шăнкăртамри культура çурчĕн директорĕ Миндания Якушева тата ыттисем саламларĕç, çепĕç туйăмсене, юрату хĕлхемне малашне те упрама ырлăх-сывлăх, телей сунчĕç.

Альбина АСТРАХАНЦЕВА