Иртнĕ шăматкун, декабрĕн 16-мĕшĕнче, Патăрьелĕнчи ачасен пултарулăх шкулĕнче преподавательте ĕçлекен Раççей Федерацийĕн тата Чăваш Республикин культурăн тава тивĕçлĕ ĕçченĕн, Пĕтĕм тĕнчери культура тата искусство академийĕн академикĕн, паллă ỹнерçĕн Мидхать Шакировăн 70 çулхи юбилейне халалланă куравĕ уçăлнă. Автор курава пейзажсемпе, натюрмортсемпе çыхăннă чылай паха ỹкерчĕк тăратнă. Сăрă ăстин ỹкерчĕкĕсенче çут çанталăк чĕрĕлĕхĕ, асамлăхĕ, ял çыннисен пурнăçĕ, хисеплĕ ĕçченсен сăнарĕ, тăван çĕршыв пуянлăхĕ тыткăнлать.

Курава уçнă çĕре Патăрьел муниципалитет округĕн пуçлăхĕн социаллă ыйтусемпе тимлекен çумĕ-финанс пайĕн начальникĕ Светлана Чернова, Чăваш Енпе Палестина халăхĕсем хушшинчи туслăхпа килĕшỹ обществин президенчĕ Аль Балауи Бассам Фатхи, Чăваш Республикинчи Художниксен союзĕн председателĕ Владимир Нагорнов, Тутарстан Республикинчи Художниксен союзĕн председателĕ Альберт Шиабиев, ĕçтешĕсем, унăн пултарулăхне хисеплекен çывăх тусĕсем хутшăннă, юбиляра ăшшăн саламланă, творчество ĕçĕнче пысăк çитĕнỹ суннă.

Мидхать Алимзянович Патăрьелĕнчи ача-пăча искусствин шкулĕнче 1995 çултанпа тăрăшать. Вăл хăйĕн ĕçĕнче ачасене ỹнер ăсталăхне вĕрентме, сăрăпа кирлĕ пек усă курма, çитĕнекен ăрăва чăн-чăн патриот пулса ỹсме, тăван çĕршыва юратма тата хисеплеме çамрăкранах хăнăхтарать. Унăн хисеплĕ ятне чăваш энциклопедине те кĕртнĕ.

Вăл преподаватель ĕçĕ-хĕлĕсĕр пуçне халăхсем хушшинче пĕр-пĕрне хисеплес тата туслăха çирĕплетес тĕллевпе те нумай тимлет. Мидхать Шакиров Чăваш Енпе Палестина халăхĕсем хушшинчи туслă çыхăнăва тытса тăракан обществăн комитет председателĕ. Ку таранччен вăл хутшăннипе "Палестина Раççей тата ют çĕршыв ỹнерçисен куçĕпе" ятпа Мускавра, Хусанта, Ярославльте, Шупашкарта, Ижевскра, Палестинăра, Иорданире тата ытти çĕрте те 70 курав йĕркеленĕ. Унсăр пуçне вăл Патăрьел муниципалитет округĕнчи чылай яла герб та ỹкерсе панă.

(Хамăр корр.).