ВАТТИСЕМ сăнанă тăрăх çуллахи Микуласăр çу пуçланмасть, хĕллехисĕр вара шартлама сивĕ кунсем пикенмеççĕ теççĕ. Тепĕр чухне çут çанталăк саккунĕ хăйне майлă улшăнусем, тỹрлетỹсем те кĕртет. Акă, декабрĕн 19-мĕшĕнче православи тĕнне ĕненекенсем тĕлĕнтермĕш вăй-хăват паракан çветтуй Николай кунне паллă турĕç. Çак ятпа кашни чиркỹрех кĕлĕ иртнĕ, пачăшкăсем унта пынисене пил панă. Чылай чухне çак кун хыççăн Хĕл Мучи çийĕнчех хуçа пулнине, питрен-куçран хыпаланине туяканччĕ. Кăçалхи çанталăк вара хăйне евĕрлĕхпе палăрать. Раштав пуçламăшĕнчи шартлама хыççăн урамра паянхи кун та çуркунне евĕр ăшă тăрать-ха, малашне те Çĕнĕ çулчченех сивĕ пулмасса калаççĕ. Çанталăк вылянчăк "кăмăлпа" тăни грипп, ОРВИ чирĕсене пуç пулмалли лайăх вăхăт. Юн пусăмĕпе, чĕре чирĕпе нушаланакансен те çак вăхăтра хăйсен сывлăхне сăнасах тăмалла.