Çĕнĕ çул саламĕсене те çитерĕç ПАТĂРЬЕЛ муниципалитет округĕнчи территори пайĕсенчи ялсенче Украинăри ятарлă çар операцине хутшăнакан салтаксене валли хỹтĕлев сеткисем çыхас ĕç малалла та пырать. Маларах вĕсене тĕттĕмрех материалтан, çут çанталăк тĕслĕрех хатĕрлетчĕç. Халĕ ăна тавралăха кура çутăрах пусма татăкĕсенчен çыхаççĕ. Патăрьелĕнчи централизациленĕ клуб системинче те волонтерсем, территори пайĕн администрацийĕн, клуб ĕçченĕсем тата пĕрремĕш вăтам шкулти 2"а" класра вĕренекенсен ашшĕ-амăшĕ Н. Антонова ертсе пынипе çак ĕçе йĕркеленĕ. Шкул ачисем вара сеткăсемпе пĕрлех салтаксем валли çывхарса килекен Çĕнĕ çул ячĕпе саламласа тата çĕнтерỹпе таврăнма сывлăх сунса ăшă салам çырăвĕсене те çитерĕç.

 Сăмах май каласан, Патăрьелĕнчи Юрий Тинюков ертсе пыракан "Батыревский доброволец" волонтерсен ушкăнĕ пĕр чарăнми ятарлă çар операцийĕнчи ентешĕмĕрсем патне гуманитари пулăшăвĕ çитерес тĕллевпе тимлет. Вĕсен ырă ĕçĕ нихăçан та манăçмĕ.