Мускаври ВДНХ площадкинче вырсарникун "Единая Россия" партин съезчĕ иртнĕ. Унта Чăваш Енрен ЧР Патшалăх Канашĕн Председателĕ, партин регионти уйрăмĕн секретарĕ Леонид Черкесов, республикăн РФ Президенчĕ çумĕнчи представителĕ Алексей Ладыков, Николай Владимиров сенатор, Дума депутачĕ Алла Салаева, партин ЧР Патшалăх Канашĕнчи фракцин ертỹçи Николай Николаев, партин регион политканашĕн президиумĕн членĕ Николай Малов тата партин регионти ĕç тăвакан комитечĕн ертỹçи Александр Осипов хутшăннă.

- Съезд пысăк йышăну турĕ - эпир хамăрăн Президент суйлавне хутшăнакан кандидатшăн пулнине çирĕплетрĕ, - тенĕ Леонид Черкесов. - Владимир Путин пек вăйлă лидер урăх çук. Эпир мĕн туни пĕтĕмпех наци лидерĕн курсне ырланипе çыхăннă. Ку - патшалăхăн çирĕп аталанăвĕ, граждансен интересĕсен хỹтĕлени, çынсен пурнăç пахалăхне лайăхлатни. Парти съезчĕ, тĕрĕссипе, Президент суйлавĕн кампанине пуçлать. Умра питĕ яваплă тапхăр кĕтет.

Съездра РФ Президенчĕ Владимир Путин "Единая Россия" хăйĕн майлă пулнăшăн тав тунипе пĕрлех вăл парти программи çынсен пурнăçне лайăхлатассине тĕпе хунине аса илтернĕ, халăхăн ыйтăвĕсене татса парас тĕллевпе сывлăх сыхлавĕн пуçламăш звенине, инфратытăма аталантарассине, ытти сферăна пырса тивекен ĕçсене суйлав умĕнхи программăна кĕртмеллине çивĕчлетнĕ.

Александр ИВАНОВ

Шухăш

Пĕрлĕхре - вăй

Иртсе пыракан çулталăкăн юлашки уйăхĕ паллă пулăмсемпе пуян. Эпир малтан Владимир Путин 2024 çулхи мартăн 15-17 иртекен Раççей Президенчĕн суйлавне кандидат пулса хутшăнма килĕшни пирки пĕлтĕмĕр, ун хыççăнах çĕршыв ертỹçи тỹрĕ линипе пресс-конференци формачĕпе 2023 çула пĕтĕмлетрĕ, Раççейре пурăнакансен тата тĕрлĕ МИХ журналисчĕсен ыйтăвĕсене хуравларĕ.

Тĕрлĕ санкцие пăхмасăр пирĕн çĕршыв экономики начар мар аталанать. Çулталăк вĕçне шалти пĕтĕмĕшле продукчĕн ỹсĕмĕ (ВВП) 3,5 процент пулмалла, пĕлтĕр ку кăтарту 2,1 процентпа танлашнă. Президент тĕп тĕллев суверенитета çирĕплетесси тесе пĕлтерчĕ. Кунта сăмах çĕршыв хăрушсăрлăхĕ пирки кăна мар, Раççей экономикин, технологисен суверенитечĕ пирки те пырать. Çавăн пекех Владимир Путин Украинăри ятарлă çар операцине хутшăнакан çар çыннисен хастарлăхне те палăртса хăварчĕ. Акă, мобилизаци йĕркипе кайнисенчен Раççей Геройĕн ятне тивĕçнисем - 14 çын! Хăйсен паттăрлăхĕпе орден-медаль илнисем тата мĕн чухлĕ. Паллах, çар çыннисене гуманитари пулăшăвĕпе тивĕçтерни те питĕ кирлĕ утăм. Ватти-вĕтти хутшăнать çак сăваплă ĕçе. Уйрăмах волонтерсем, территори пайĕсен начальникĕсем хастар. Çар операцийĕ пуçланнăранпах маскировка сетки çыхас ĕçе лайăх йĕркелесе ячĕç пирĕн округра.

Эпир, агпромышленность ветеранĕсем, ятарлă çар операцине хутшăнакансене пулăшупа тивĕçтерессине лайăх йĕркеленĕшĕн Патăрьел муниципалитет округĕн пуçлăхне Рудольф Селиванова тав сăмахĕ каласа хăварасшăн. Паллах, Юрий Тинюков волонтера та ырăпа палăртатпăр. Хамăр пурнăçа çĕр ĕçĕпе çыхăнтарнă май ял хуçалăх ĕçченĕсен çитĕнĕвĕсемпе чăннипех те савăнатпăр. Юхмапа Пăла тăрăхĕ яланах республикăра малтисен йышĕнче.

 Çак кунсенче суйлавçăсен пуçару ушкăнĕ Владимир Путин 2024 çулта иртекен Президент суйлавне хутшăнма кăмăл тунине ырласа йышăнни çумне эпĕ те хутшăнатăп. Малашне вара ун кандидатуришĕн ырласа çынсене алă пустармалли тапхăр пуçланĕ. Эпĕ ял хуçалăх ветеранĕсемпе çĕр çинче тăрăшакансем çак ĕçрен пăрăнса юлмасса шансах тăратăп.

Тальгат ШАКУРОВ, Патăрьел муниципалитет округĕнчи Общество палатин членĕ, АПК ветеранĕсен канашĕн председателĕн çумĕ