Кăçал аслă ăру хастарĕсемпе онлайн мелĕпе хăйсен пĕлĕвне ỹстерме ултă заняти йĕркелерĕмĕр. Кашни тĕл пулу хăйне евĕр кăсăклă иртрĕ. Тивĕçлĕ канăва тухнисем сывлăха çирĕплетес, хăйсен ĕмĕрне тăсас, çав вăхăтрах общество пурнăçне хастар хутшăнас тĕллевпе те пултаруллă. Вĕсем Патăрьелĕнчи "Паттăр" физкультурăпа спорт комлексĕнче иртекен "Сывлăх кунне" (кашни кĕçнерникун, тỹлевсĕр) тăтăшах хутшăнаççĕ, бассейна ишме çỹреççĕ, шашка-шахмат турнирĕнче çивĕч ăсне кăтартаççĕ тата ытти те.

Кăçал муниципалитет округĕнчи Пенсионерсен пĕрлĕхĕн пултаруллă членĕсем "Пирĕн çунатсем çирĕп", "Чун юрланă чух" фестивальсене хутшăнса тĕрлĕрен номинацисемпе малти вырăнсене йышăнчĕç. Ку тĕлĕшпе уйрăмах "Чемен" (ертỹçи Анатолий Гаврилов), "Пашьел" (Зот Степанов) халăх фольклор ансамблĕсене, ЧР культурăн тава тивĕçлĕĕçченĕсене Луиза Леонтьевăна, Петр Никитина, купăсçăсен "Салам" ансамбльне палăртса хăварасшăн. Вĕсем тĕрлĕ номинаципе лауреатсем пулчĕç.

Юхмапа Пăла тăрăхĕнче алă ĕç тума, пỹртре е пахчара илемлĕ чечексем ỹстерме кăмăллакан ватăсем те сахал мар. Кăçал республикăри Пенсионерсен пĕрлĕхĕн пуçарăвĕпе пуçласа йĕркеленĕ конкурс та çакнах çирĕплетрĕ.

 Тивĕçлĕ канăва тухнисем ял, урам, хăйсен хушма хуçалăхĕн илемĕшĕн, капăрлăхĕшĕн çав тери тăрăшаççĕ. Патăрьелĕнче пурăнакан Мая Селендеева педагог-ветеран хăйĕн кил хуçалăхĕнче çитĕнтерекен чечексен тĕнчи вара муниципалитет округĕнче çеç мар, республикăра та палăрчĕ.

Пенсионерсен пĕрлĕхĕн хастарĕсем муниципалитет округĕнче иртекен спорт ăмăртăвĕсене те тăтăшах илем кỹреççĕ. "Раççей йĕлтĕр йĕрĕ", Наци кросĕ, "Сывлăх патне 10000 утăм" тата ытти тĕрлĕ ăмăрту аслă ăру старта тăмасăр иртмест. Николай Урмаков, Арсентий Иванов, Валерий Салмин, Николай Григорьев тата ытти спорт ветеранĕсем çулне кура мар кашни спорт мерприятинех хутшăнма тăрăшаççĕ.

 Юлашки вăхăтра ялсенче Украинăри ятарлă çар операцине хутшăнакан салтаксем валли хỹтĕлев сеткисем çыхнă çĕре те аслă ăру çыннисем тăтăшах хăйсен тỹпине хываççĕ, çĕнтерĕве çывхартма пулăшаççĕ.

Çак кунсенче Раççейри Пенсионерсен пĕрлĕхĕн Чăваш Республикинчи регионти уйрăмĕн çулталăка пĕтĕмлетекен пухăвĕ иртрĕ. Унта Патăрьел муниципалитет округĕнчи Пенсионерсен пĕрлĕхĕ 2023 çул итогĕпе чи лайăххисен шутне кĕнине палăртрĕç, диплом парса чыс турĕç. Çакă вăл пирĕн пĕрлехи ĕç. Çитес çул та палăртнă тĕллевсене пĕрлехи вăйпа татса пама хавхалантаракан сăлтав.

 Полина ЛОГУНОВА, Патăрьел муниципалитет округĕнчи Пенсионерсен пĕрлĕхĕн ертỹç