Кашни çын, уйрăмах ача-пăча Çĕнĕ çул мĕнле те пулин хаваслăх, ырă пулăм, çĕнĕлĕх илсе килессе кĕтет. Йăлана кĕнĕ йĕркепе савăнăçлă уява пирĕн тăрăхра та чылайăшĕ йăлтăр-ялтăр çутăпа, асамлă фейерверкпа кĕтсе илме тăрăшать. Çапах та сирĕн ĕмĕт-тĕллев пурнăçа кĕтĕр, çывхарса килекен уяв кăмăл-туйăма ан пусартăр тесен чăн малтанах мероприятисем ирттернĕ тапхăрта инкек-синкекрен, пушартан асăрханас тĕллевпе фейерверк яма хатĕрленĕ ятарлă площадкăсем кирлĕ.

Çакна та шута илмелле! Пиротехникăна пасарта мар, ятарлă магазинсенче, ăна сутма ирĕк пур сутуçăсенчен туянмалла. Енчен те корпус сиенленнине асăрхасан ăна туянма юрамасть. Сирпĕнекен хатĕрпе мĕнле усă курмаллине сутуçăран тĕплĕн ыйтса пĕлмелле. Ку тĕлĕшпе сирĕн опыт сахал пулсан кăткăсах мар пиротехника çеç туянмалла.

Çĕнĕ çул çитиччен вăхăчĕ пур-ха. Çавăнпа та фейерверксене ачасемшĕн курăнман типĕ вырăнта, ăшăтмалли хатĕрсенчен инçетре упрамалла. Уяв салютне яма вара чи опытлă, халиччен çак ĕçпе çыхăннă, паллах, урă çынна çеç шанса памалла.

 Кăштах ятарлă площадка пирки те асăнса хăварасшăн. Вăл тикĕс вырăн пулмалла. Ун çинче йывăçсем, ытти чăрмавсем кирлĕ мар. Фейерверксем вĕçнĕ çĕрте те хăвăрт хыпса илме, çунма пултаракан япаласем выртни те хăрушлăх кăларса тăратать. Ăна пурăнмалли çуртран 50 метр аякра вырнаçтармалла.

Пиротехникăпа усă курма хатĕрленĕ территоринче пушар сỹнтерекен пĕрремĕш хатĕрсем пулмалла. Çак площадкăра чикарккă туртма, кăвайт чĕртме пачах юрамасть. Вĕсем пысăк хăрушлăх кăларса тăратаççĕ.

Çакна та манса ан кайăр! Ракетăсене алăран, чỹречерен е балконран яма та юрамасть. Вĕсене вертикальлĕ е 10-15 градус кĕтеспе вырнаçтармалла.

Асăрханăр: фитиле чĕртсе яриччен çунакан элементсем ăçтан вĕçсе тухассине тĕрĕс пĕлмелле. Фейерверксене пăхса тăракансем еннелле яма юрамасть! Пенĕ чухне пиротехника изделийĕсем çаврăнса ан ỹкчĕр, саланса ан кайччăр тесе ăна яраканăн сăнасах тăмалла.

Андрей ТУКМАКОВ, Патăрьелĕнчи пушар надзорĕн начальникĕ