Архив ĕçĕн ертỹçи, Чăваш Республикин культурăн тава тивĕçлĕ ĕçченĕ Николай Ильич Медведев (23.12.1953) 70 çул каялла Сăкăтра çуралнă.

Николай Медведев - И.Я.Яковлев ячĕллĕ Чăваш патшалăх педагогика институчĕн, Чулхулари социаллă политика институчĕн выпускникĕ. Вăл хăйĕн ĕç биографине "Красное Знамя" колхозра пуçланă. 1975-1981 çулсенче Сăкăтри вăтам шкулта класс тулашĕнчи ĕçсен организаторĕ, музыка учителĕ пулса ĕçленĕ. 1982-1997 çулсенче ЧР Министрсен Канашĕн оргпайĕнче инструктор, тĕп специалист, Чăвашпотребсоюз правленийĕн председателĕн референтĕнче, ЧР Министрсен Канашĕн вырăнти администрацисемпе çыхăнса ĕçлекен тата кадрсемпе ĕçлекен управленийĕн тĕп специалистĕнче, культура министрĕн пĕрремĕш çумĕнче, республикăри культура училищин директорĕнче, Чăваш Республикин Министрсен Кабинечĕн Председателĕн секретариат ертỹçин çумĕнче тăрăшнă. 1998-2014 çулсенче - Чăваш Республикин кинодокументацийĕпе электронлă патшалăх архивĕн директорĕ.

Николай Медведева "Тăван çĕршыв умĕнчи тава тивĕçлĕ ĕçсемшĕн" орденăн медалĕпе, Чăваш Республикин Патшалăх Канашĕн Хисеп хучĕпе наградăланă.

х х х

Химик, СССР наука академийĕн чăн членĕ, хими наукисен докторĕ, профессор, СССР Министрсен Канашĕн, СССР Патшалăх, Н. Д. Зеленский ячĕллĕ СССР наука академийĕн, А.А. Баландин ячĕллĕ премисен лауреачĕ, Тăван çĕршывăн Аслă вăрçин участникĕ Хабиб Миначевич Миначев (24.12.1908-25.03.2002) 115 çул каялла Хирти Пикшикре çуралнă.

Хабиб Миначев - М.В. Ломоносов ячĕллĕ Мускаври патшалăх университечĕн выпускникĕ. 1934 çултан тытăнса вăл Н.Д.Зеленский ячĕллĕ органика химийĕн институтĕнче ĕçленĕ. 1955-1977 çулсенче - çак институтрах директор çумĕ. 1989 çулччен лабораторие ертсе пынă, каярах - дирекци советникĕ.

Ентешĕмĕр ертсе пынипе хỹтĕлев промышленноçĕпе космос валли ракета топливи - супербензин шутласа тупнă. Унăн наука ĕçĕсем углеводородпа çыхăннă. Вăл наука шкулне йĕркеленĕ пулнă, унта 50 ытла докторпа наука кандидачĕ тăрăшнă.

Хабиб Миначев 900 ытла наука ĕçĕ пичетленĕ, вăл шутран 7 монографи.

Пирĕн ентешĕмĕре Ленин, икĕ хутчен Ĕçлĕх Хĕрлĕ Ялав, Хисеп палли, Тăван çĕршывăн Аслă вăрçин иккĕмĕш степеньлĕ орденĕсемпе наградăланă, унăн ячĕпе Шупашкарти пĕр урам хисепленсе тăрать.

 ("Çулталăк кĕнекинчен")