Раил КАМАЛОВ, Кзыл Чишма территори пайĕн начальникĕ:

- Раççей Президенчĕ Владимир Путин "Сывлăх сыхлавĕ" наци проекчĕпе килĕшỹллĕн пуçламăш звенора медицина пулăшăвĕ парассине лайăхлатас енĕпе вырăнсенче тĕллеве çирĕп пурнăçласа пымаллине калать. Ку тĕлĕшпе Патăрьел муниципалитет округĕ çине тăрса ĕçлени, ял халăхĕн ыйтăвне тивĕçтерни куç кĕрет. Акă, нумай пулмасть çеç пирĕн территори пайĕнчи Красномайскинче пурăнакансемшĕн Çĕнĕ çул умĕн пысăк парне пулчĕ, ФАП уçăлчĕ. Сывлăх сиплевĕн çуртне питĕ хăвăрт, тирпейлĕ, палăртнă вăхăт çитичченех хута ячĕç. Паян фельдшерпа акушер пункчĕ 350 çынна тивĕçтерет, малтанхи пулăшу парать. Халăх çакăнпа питĕкăмăллă. Маларах Кзыл Чишмари врач амбулаторине те юсаса çĕнетнĕччĕ. Халĕ территори пайĕнчи икĕ ялта та хăтлă сиплев çурчĕсем пур.

Валерий ПЛАТОНОВ, Чăваш Республикин физкультурăн тата спортăн тава тивĕçлĕ ĕçченĕ, Патăрьелĕнчи "Паттăр" спорт шкулăн тренер-преподавателĕ:

- Иртсе пыракан 2023 çул спорт каçалăкĕнче начар мар çитĕнỹпе паллă пулса юлчĕ. Юлашки çулсенче эпир тĕрлĕ ушкăнти ачасемпе триатлон енĕпе чылай çитĕнỹ турăмăр. Ку тĕлĕшпе кăçалхи çулталăк уйрăмах ăнăçлă иртрĕ. Эпир (Светлана Рубцова тренерпа) Пĕтĕм Раççейри ачасен лигин 8 этапне те явăçса тĕрлĕ хулара - Волгоградра, Санкт-Петербургра, Ярославльте, Хусанта, Чулхулара тата ытти çĕрте те - хутшăнтăмăр, малти вырăнсем çĕнсе илтĕмĕр. Çавна пула лигăн пĕтĕмĕшле этапĕпе пирĕн тăватă спортсмен триатлонпа Раççей шайĕнче малтисен йышне кĕме пултарчĕç. Ĕмĕтсем татах та пысăк. Çитес çул спортăн çак енне тата ытларах анлăлатасшăн.

Алевтина ЛЕПЕШКИНА, тăватă ача амăшĕ, Патăрьел муниципалитет округĕнчи "Чи лайăх çемье - 2023" конкурс çĕнтерỹçи:

 - Çемье - çĕршыв тĕрекĕ, аталану çул-йĕрĕ, ырă малашлăхăн никĕсĕ. Çемье илемĕ вара - чун тĕпренчĕкĕсем, ачасем. Мăшăрăмпа эпир икĕ хĕр те икĕ ывăл çитĕнтеретпĕр. Вĕсене кашнинех мĕн пĕчĕкрен тивĕçлĕ воспитани пама тăрăшатпăр, май пур таран çемьепе тĕрлĕрен спорт, культура мероприятине те хутшăнатпăр. Пĕрлех канатпăр, уçăлса çỹретпĕр. Çакă пирĕн çемьене тата илемлĕрех тăвать.

2023 çул пирĕншĕн чылай ырă пулăмпа çырăнса юлчĕ. Вĕсенчен чи пĕлтерĕшли тата сумли Телейлĕ ачалăх çулталăкĕнче Юхмапа Пăла тăрăхĕнче йĕркеленĕ "Чи лайăх çемье" конкурсра çĕнтерỹçĕ ята тивĕçни. Округ чысне эпир республика шайĕнче йĕркеленĕ конкурсра та хỹтĕлерĕмĕр.

Альбина ЕГОРОВА ыйтса пĕлнĕ.