Мускаври "Раççей" курав-форум ĕçлеме пуçланăранпа уйăх та иртрĕ. Унта 131 экспозици вырнаçтарнă. Çĕршыври кашни регион хăйĕн историйĕпе, йăли-йĕркипе, ку е вăл отрасльти çитĕнĕвĕсемпе паллаштарас тĕллевпе йĕркеленĕ ăна. Регионсен экспозицийĕ 75-мĕш павильонта вырнаçнă. Чăваш Ен пуян та илемлĕ курав стенчĕ хатĕрленĕ.

Экспозици варринче - тухья евĕрлĕ арт-объект. Вăл калама çук илĕртỹллĕ курăнать. 6 метр çỹллĕш, тĕрлĕ тĕспе çуталса тăрать. Куравпа паллашакансем кунта сăн ỹкерттернипе пĕрлех республикăн чи илемлĕ вырăнĕсемпе виртуаллă çул çỹреве тухма пултараççĕ. VR шлем тăхăнатăн та - тỹрех Чăваш Ене лекетĕн. Шупашкарти залива, "Амазони", Çĕнтерỹ паркĕсене, Мăкăр кĕперĕ патне çитсе курма пулать. Çитес çулхи апрелĕн 12-мĕшĕччен пыракан "Раççей" курав-форум программи пуян, кашни кунах 500 ытла ĕç-пуç иртет - экскурсисем, концертсем, ăсталăх сехечĕсем тата ытти те. Регионсен кунĕсене те палăртса хунă. Чăваш Ен декабрĕн пĕрремĕшĕнче хăйĕнпе паллаштарчĕ те ĕнтĕ.

Декабрĕн 19-мĕшĕнчен куравра Чăваш Республикин вĕрентỹ министерствин лапамĕ ĕçлеме пуçларĕ. Патăрьел тăрăхĕнчи вĕрентекенсене те чĕннĕ унта. Ача-пăча ăсталăх шкулĕнчи М. Шакиров, Е. Мишина, А. Антонова, А. Носкова, Т. Овечкина, Ыхра Çырми вăтам шкулĕнчен С. Кулакова, Патăрьелĕнчи пĕрремĕш вăтам шкулти О. Спинова (ỹкерчĕкре) вĕрентекенсем те ВДНХара пулса куртăмăр. Эпир унта курма çеç кайман, пурĕ 14 ăсталăх сехечĕ йĕркелерĕмĕр. Вĕсен шутĕнче "Çĕнĕ çул теттине наци эрешĕпе илемлетесси", "Çĕнĕ çулхи юр пĕрчи", "Хурăн хуппи çинчи открытка", "Хĕллехи пейзаж", скрапбукинг техникипе хатĕрленĕ "Çĕнĕ çул открытки", "Илемлĕ кăçатă" тата ытти те. Юхмапа Пăла тăрăхĕнче тĕлĕнмелле пултаруллă вĕрентекенсем ĕçленине тепĕр хут курса ĕнентĕм. Çак хушăрах куракансемпе, ăсталăх сехетне хутшăнакансемпе, лотерея вăййисем çине-çинех ирттертĕмĕр. Кашни хăна парнеллĕ пулчĕ, ăшă сăмахсем каласа хавхалантарчĕ.

Курав ырă кăмăл-туйăм çуратрĕ. Пĕр кунта çĕршывра пурăнакан тĕрлĕ халăх хăйне евĕрлĕхне курса хаклама май пулчĕ. Мускаври çакнашкал пысăк куравра пулса курма тỹр килнишĕн питĕ хĕпĕртерĕмĕр. Ыттисене те унта кайса курма сĕнетĕп.

Светлана КУЛАКОВА