Патăрьел муниципалитет округĕнче çулсеренех Çĕнĕ çула çĕнĕ пулăмпа, ырă ĕçпе кĕтсе илеççĕ. Кăçал та çаплах пулчĕ. Декабрĕн 27-мĕшĕнче Шăнкăртамра икĕ паллă пулăм истори страницине çырăнса юлчĕ. Çак кунхине выльăх-чĕрлĕх тирпейлекен 17-мĕш цех (4-шĕ вăхăтлăха ĕçлемеççĕ) хăйĕн алăкне уçрĕ.

Хальхинче çак савăнăçа Альберт Энверович Хамбиковăн çемйи ял-йышпа, килнĕ хăнасемпе пĕрле пайларĕ. Вĕсем ăна хăйсен вăйĕпе, çулталăк çурăра туса лартнă. Выльăхсене тирпейлекен пунктра талăкра 15 пуç мăйракаллă шултра выльăха кирлĕ пек тирпейлесе продукцие тĕрлĕ республикăна ăсатма шутлаççĕ. Çĕнĕ объектра тата 5-6 ĕç вырăнĕ хутшăнать. Çак территорирех Альберт Хамбиков 50 пуç лаша усрать. Сăмах май каласан, юлашки çулсенче вăл лаша спортĕнче те начар мар çитĕнỹпе савăнтанарать.

Сумлă мероприятие ЧР вице-премьерĕ, ял хуçалăх министрĕ Сергей Артамонов, Патăрьел муниципалитет округĕн пуçлăхĕ Рудольф Селиванов, Патăрьел муниципалитет округĕнчи депутатсен Пухăвĕн председателĕ Николай Тинюков, патшалăх ветеринари службин округри выльăх-чĕрлĕх чирĕсемпе кĕрешекен станци начальникĕ Петр Ефимов, Шăнкăртам территори пайĕн пуçлăхĕ Марат Айзатуллов тата ыттисем те хутшăнчĕç.

Çак кунхинех Шăнкăртамри "Сандугач" ача садĕнче пĕчĕк шăпăрлансене çĕр ĕçне хăнăхса ỹсме вĕрентекен агролаборатори пỹлĕмне те уçрĕç. Воспитательсен пулăшăвĕпе шăпăрлансем хăйсемех пахчаçимĕç вăрлăхĕсене хатĕрлеççĕ, вĕсене калчалантарса çитĕнтереççĕ, çулла парниксенче те тăрăшаççĕ тата ытти те. Ачасене çакăн пек лабораторие уçма ялти Ферид Чабатов фермер пулăшнă.

Ĕçлĕ ушкăн "Батыревский" хуçалăха тата "Исток" çĕр фирмине çитсе ял хуçалăх предприятийĕсене агропромышленность комплексне аталантарас тĕлĕшпе пысăк çитĕнỹ тунăшăн тав турĕ, Çĕнĕ çулта та пысăк çитĕнỹсемпе хавхаланса ĕçлеме ырă сунчĕ.

Тавралăха каç сĕмĕ çапсан Патăрьел муниципалитет округĕн администрацийĕ умĕнчи лапама Çĕнĕ çул эрешĕпе капăрлатнă тракторсем, Хĕл Мучи тумне тăхăннă механизаторсем Украинăри ятарлă çар операцинчи салтаксене пулăшас, эпир вĕсемпе пĕрлех пулнине палăртас тĕллевпе пуçтарăнчĕç, Юрпикесемпе Хĕл Мучисем кунта пухăннисене савăнăç кỹчĕç.

 Альбина ЕГОРОВА