ПЕРВОМАЙСКИ территори пайне кĕрекен Сител ялĕнчи клуб пысăк кермен пекех кĕрлесе тăрать. Вĕсем культура "вучахне" хăйсем хутса ăшăтаççĕ пулин те кунта ĕçлекен Оксана Хомуткина библиотекарьпе Ирина Лякова культорганизатор ял çыннисем валли мĕнле кăна мероприяти, уяв йĕркелесе памаççĕ-ши? Пĕрре те ỹркенсе тăмаççĕ. Унсăр пуçне тĕрлĕрен кружок та ĕçлет. Акă, "Ăста алăсем" - культура ĕçченĕсем йĕркелекен хушма мероприятисенчен пĕри. Ача амăшĕсем ĕлĕкхи улаха хатĕрленнĕ евĕр кĕтеççĕ çак куна. Пурте хăйсен чун канăçне тупма пулăшакан алă ĕçне пурнăçлаççĕ. Пĕрисем çыхаççĕ, теприсем тĕрлеççĕ, виççĕмĕшсем вĕтĕ шăрçаран кăкăр çыххи хатĕрлеççĕ тата ытти те. Аслăрах çулхисем çамрăксене унчченхи пурнăç пирки аса илни те пуриншĕн те кăсăклă.

Пытарма кирлĕ мар, муниципалитет округĕнчи хăш-пĕр çĕнĕ культура çурчĕсенчех хăйсен ĕçне ячĕшĕн çеç пурнăçласа пыракансем те пур. Кун пирки ялсенче пăшăрханса калаçнине те илтме пулать.