Кăшарни уявне Юхмапа Пăла тăрăхĕнче çулленех паллă тăваççĕ. Кăçал та çичĕ вырăнта шыва кĕме тата çăвăнса илме вырăн хатĕрленĕ пулнă (вĕсемпе хаçатра паллаштарнăччĕ).

Патăрьел муниципалитет округĕн пуçлăхĕ Рудольф Селиванов Первомайскипе Сител хушшинче вырнаçнă "Çут çăлкуç" патĕнчи Турă амăшĕн "Сиплевçĕ" иконĕ ячĕллĕ тата Красномайскинчи купельсене çитсе курнă, виçĕ хутчен шыва чăмса тухнă. Сăмах май каласан, Рудольф Васильевич çак сывă пурнăç йĕркине тахçантанпах тытса пырать.

Пуринче те хăрушсăрлăх йĕркисене çирĕп пăхăннă, хывăнса тăхăнма пỹлĕмсем, чỹхенсе илнисене валли вĕри чей хатĕрленĕ. Çавăн пекех уявра инкек-синкекрен сыхланса ял территори пайĕн представителĕсем, медицина ĕçченĕсем, йĕрке хуралĕн тата МЧС сотрудникĕсем пулнă.

Александр ИВАНОВ