Хусан хулин ипподромĕнче лаша спортне юратакансен кăçалхи пĕрремĕш ăмăртăвĕ иртнĕ. Унта тĕрлĕ регионтан 21 урхамах хутшăннă. Хусанăн Çĕнĕ çулхи кубокне виççĕмĕш чупура "Исток" çĕр ĕç фирмин "Умикс" урхамахĕпе Патăрьелĕнчи "Паттăр" спорт шкулĕнче инструктор пулса ĕçлекен Алексей Краснов çĕнсе илнĕ. 1600 метрлă дистанцие 2 минут та 16 секкундра парăнтарни чи лайăх кăтарту шутланать.

Чăваш Республикинчи лаша спортне юратакансен федерацийĕ 2023 çулхи 37 юланутçă хушшинчи ăмăртусене пĕтĕмлетнĕ. Пĕрремĕш вырăна Тикеш ялĕнче çуралса ỹснĕ, халĕ Çĕнĕ Шупашкарти лаша спорчĕн шкулĕн директорĕ, ЧР физкультурăпа спорчĕн тава тивĕçлĕ ĕçченĕ Валерий Краснов тухнă.

Иккĕмĕшĕнче - Раççей Федерацийĕн физкультурăпа спорчĕн отличникĕ, пĕрремĕш категориллĕ урхамахçă Алексей Краснов.

Шăнкăртам ялĕнчи Альберт Самаринпа Минсур Тухфетуллов малтисене çывăх тăни те кăмăллă.

Халĕ лаша спортне юратакансем малашнехи ăмăртусене хатĕрленеççĕ.

Николай КРАСНОВ