Хальхи вăхăтра Чăваш Республикинче пурнăçа кĕрсе пыракан наци проекчĕсен тĕп тĕллевĕ - халăхăн пурнăç шайне ỹстересси, ялсене хăтлăлатасси, пуянлатасси, çынсене ĕçлеме, вĕренме, канма, сывлăхне çирĕплетме кирлĕ услови туса парасси. "Пурăнмалли çурт-йĕр тата хула хăтлăхĕ" наци проекчĕ шăпах вĕсенчен пĕри шутланать. Раççей Президенчĕ Владимир Путин пурăнмалли çурт-йĕр строительствине аталантарасси тата Раççейре пурăнакан çемьесене кирлĕ услови туса парасси тĕп тĕллев пулнине палăртать.

Чăваш Республики ку тĕлĕшпе çирĕппĕн аталанса пырать.

 2023 çулта çеç 780,7 пин тăваткал метр пурăнмалли çĕнĕ çурт хута кайнă, кăçал 2 пин тăваткал метр ытларах хута ярасшăн. Пĕлтĕр мĕн пурĕ 15,6 пин çемье, çăмăллатнă условипе усă куракан 2200 çемье пурăнмалли условине лайăхлатнă. 606 çын авариллĕ çуртран çĕннине куçнă. 2023 çулта Чăваш Республикинчи хуласемпе муниципаллă округсенче халăхăн шухăшне шута илсе 28 обществăлла территорие хăтлăх кĕртнĕ. Ку тĕлĕшпе сасăлава 135 пин ытла çын хутшăннă.

"Таса шыв" федераци проекчĕпе килĕшỹллĕн Шăмăршă, Патăрьел, Комсомольски муниципалитет округĕсенчи 5-мĕш тата 6-мĕш ушкăнри шыв пыракан вырăнсенчи строительство ĕçĕсене вĕçленĕ.

Патăрьел муниципалитет округĕ те инфратытăма çĕнетес, халăха, уйрăмах тимлĕх кирлĕ çемьесене пурăнмалли çурт-йĕрпе тивĕçтерес, ял халăхĕ валли канма, ĕçлеме, сывлăхне çирĕплетме кирлĕ услови туса парас, çĕнĕ объектсем хута ярас тĕллевпе курăмлă ĕçсем туса пырать. Юхмапа Пăла тăрăхĕнче 2017 çултанпа "Пурăнмалли çурт-йĕр тата хула хăтлăхĕ" наци проекчĕн тытăмĕнчи "Хула хăтлăхне тăвасси" проект пурнăçа кĕрсе пырать.

Асăннă проекта пурнăçа кĕртес тĕллеве пирĕн муниципалитет округĕнче 1000 тата ытларах çынлă пилĕк ял - Патăрьел, Хирти Пикшик, Сăкăт, Тутар Сăкăчĕ, Шăнкăртам - хутшăнать.

Юхмапа Пăла тăрăхĕнче 2017-2023 çулсенче федераци бюджечĕпе усă курса çурт-йĕр таврашĕн 4 территорине тата 8 обществăлла вырăна 43 миллион та 092 пин тенкĕлĕх хăтлăх кỹнĕ.

2022 çулта Шăнкăртамра "Халăхсен туслăхĕ" çамрăксен паркне хăтлăлатнă.

2023 çулта халăх сасăлавĕн итогĕпе обществăлла территорие, Патăрьелĕнчи халăх массăллă канмалли вырăна (6786,9 пин тенкĕлĕх) çак программăпах тирпейленĕ: асфальт тротуар, тĕп скульптура патне пыракан çула брусчатка сарнă, тĕп сценăна, куракансен площадкине капăрлатнă, ача-пăча лапамне тунă.

2024 çулта икĕ обществăлла территорие 6278,8 пин тенкĕлĕх хăтлăх кĕртме палăртнă. Вĕсем Тутар Сăкăтĕнчи Тĕп урамри Тăван çĕршывăн Аслă вăрçинче пуç хунисене асăнса лартнă палăк таврашĕ-Çĕнтерỹ скверĕ тата Патăрьелĕнчи халăх массăллă канакан вырăнти ĕçсене малалла пурнăçласси. Подряд организацийĕсемпе контрактсем çырнă, ĕçсене 2024 çулхи августăн 1-мĕшĕ тĕлне вĕçлесшĕн.

Альбина ЕГОРОВА