Патăрьел муниципалитет округĕн администрацийĕн Пысăк залĕнче муниципалитетăн чрезвычайлă лару-тăрăва асăрхаттарас тата пĕтерес, пушар хăрушсăрлăхĕпе тивĕçтерес енĕпе ĕçлекен комиссин ларăвĕ иртрĕ. Ăна муниципалитет округĕн пуçлăхĕ, комисси председателĕ Рудольф Селиванов ертсе пычĕ. Мероприятие Чăваш Республикинчи "Граждансене хỹтĕлес енĕпе йĕркеленĕ мероприятисен тивĕçтерỹ служби" хысна учрежденийĕн начальникĕн çумĕ Вениамин Петров, территори пайĕсен пуçлăхĕсем хутшăнчĕç.

Администрацин гражданла оборона, чрезвычайлă лару-тăру, мобилизаци тата ятарлă программăсен пайĕн начальникĕ Григорий Каллин çут çанталăкри тата техногенлă чрезвычайлă лару-тăруран хỹтĕленсе муниципипалитетра 2023 çулта туса ирттернĕ ĕçсене пĕтĕмлетрĕ тата кăçалхи тĕллевсемпе паллаштарчĕ. Муниципалитетра икĕ хутчен çут çанталăк пулăмĕсене пула чрезвычайлă лару-тăру тесе йышăннă: çулла чылай вăхăт шăрăх тата типĕ тăнипе, кĕркунне çил вăйлă алхаснипе. Иртнĕ çул 49 пушара шута илнĕ, çакă маларахри çултинчен 14 сахалтарах. Вутра икĕ çыннăн пурнăçĕ татăлнă. Инкекрен сыхланса профилактика мероприятийĕсем, калаçусем ирттернин витĕмĕ пысăккине пĕлтерчĕ Григорий Николаевич.

Вут-çулăм тухнине систерекен датчиксене халиччен ăнăçсăр çемьесем пурăнакан çуртсене çеç вырнаçтарнă. Кăçалтан çак хатĕре йышлă ачаллă килсене те лартаççĕ.

2023 çулта 35 çул-йĕр инкекĕ пулнă, ку маларахринчен 5,4 процент пĕчĕкрех. Аварисенче 5 çын вилнĕ.

Шыв-шура хирĕçле мероприятисем пирки те халех шухăшлама вăхăт çитнине палăртрĕ Григорий Каллин. Хĕл юртан пуян, çавăнпа та Пăла çывăхĕнчи ялсене, урамсене шыв илес хăрушлăх пысăк.

Первомайски территори пайĕн специалисчĕ Наталия Ермошкина чрезвычайлă лару-тăруран хỹтĕленсе вырăнта туса ирттерекен мероприятисемпе паллаштарчĕ. Аслă Арапуçсенчен тĕслĕх илмелли нумай, кунта халăх вăйĕпе чылай ĕç пурнăçлаççĕ. Вут-çулăма сỹнтерме шыв илмешкĕн территори пайĕнче пĕлтĕр виçĕ пĕвене тасаттарнă. Территори пайĕн специалисчĕсемпе культура ĕçченĕсем пĕрле ăнăçсăр, пĕччен пурăнакан тата кăмака хутакан çемьесем патне пĕрре çеç мар çитсе килеççĕ. Ялсенчи старостăсемпе хастарсем те çỹп-çапа çунтарма юраманни пирки ăнлантарусем ирттереççĕ. "Куснар" çĕр ĕç фирмипе те тачă çыхăну тытаççĕ. Кăçал хуçалăх пулăшнипе тепĕр пĕвене тасатмалла. Çавăн пекех вăл пушар сỹнтерекен машинăсем валли çунтармалли-сĕрмелли материал уйăрать, кỹлĕсем патне пыракан çулсене уçать

Тутар Сăкăт территори пайĕн начальникĕ Динар Козлов та хăйсен ĕçĕпе паллаштарчĕ.

Чăваш Республикинчи "Граждансене хỹтĕлес енпе йĕркеленĕ мероприятисен тивĕçтерỹ служби" хысна учрежденийĕн начальникĕн çумĕ Вениамин Петров Патăрьел муниципалитет округĕнче чрезвычайлă лару-тăрăва хирĕçле ĕçлессине аван йĕркеленине, малашне те инкек-синкекрен пĕр çын пек пулса тăрăшмаллине каларĕ. Гражданла хỹтĕлев системинчи çитĕнỹсемшĕн, оперативлăхшăн муниципалитет 2023 çул пĕтĕмлетĕвĕпе иккĕмĕш степеньлĕ диплома тивĕçнĕ ятпа саламларĕ. Первомайски тата Тутар Сăкăт территори пайĕсем гражданла хỹтĕлев, чрезвычайлă лару-тăрăва асăрхаттарас тата пĕтерсе, пушартан сыхланас тата шыв объекчĕсенче хăрушсăрлăхĕпе тивĕçтерес тĕлĕшпе ăнăçлă вăй хунăшăн Патăрьел муниципалитет округĕн пуçлăхĕн Хисеп грамотине илчĕç.

Ольга ПАВЛОВА