Çак кайăк пахчари, уй-хирти сиен кỹрекен хурт-кăпшанка пĕтерме чылай пулăшать. Февраль уйăхĕнче ăна тăранса пурăнмалли çимĕçсем пачах пĕтеççĕ, юр айне пулаççĕ. Туратсем çинчи хурт-кăпшанкă та пăрпа хупланать. Выçса çитнĕ кăсăя апат шырама тытăнать. Çак вăхăтра ăна этемрен пулăшу кирлĕ.

Апатланма хăмаран çапса читлĕх туса пани - питех те ырă ĕç. Читлĕхе çын иртсе çỹрекен вырăна çакни лайăхрах. Кăсăя çак апатпа тăранса пурăнать: вĕрене, хурăн, куршанак, кантăр, сирень, кавăн, арпус вăррисем, пилеш, сĕлĕ, шурă çăкăр тĕпренчĕкĕсем.

Хăш-пĕр кайăк - çирĕк тăрри, шăкăлчи, уйăп - çум курăк вăррипе тăранса пурăнать. Хĕллехи вăхăтра вĕсене пулăшма кăшкар ути, мăян, вĕлтĕрен, хупах вĕтетсе пама юрать.