Патăрьел муниципалитет округĕнчи депутатсен Пухăвĕн депутачĕпе Валерий Рубцовпа Тăрăн территори пайĕн пуçлăхĕн Николай Рубцовăн пỹлĕмĕнче ăнсăртран тĕл пулма тỹр килчĕ. Калаçу хĕллехи вăхăтра çулсене юртан тасатса тăрас пирки пыратчĕ. –

Ман енчен çулсене тасатса, пăхса тăрас енĕпе нимĕнле асăрхаттару та çук. Çынсенчен те ỹпкелешнине илтмен,- терĕ Николай Михайлович çулсене тирпейлесе тăракан "Энигма" тулли мар яваплă общество ертỹçине.

Хальхи вăхăтра çак общество муниципалитет округĕн яваплăхĕ çинче тăракан 60 çухрăм, çавăн пекех 3 территори пайне кĕрекен Тăрăн, Кĕçĕн Патăрьел, Çĕнĕ Ахпỹрт, Кивĕ Катек, Патăрьел ялĕсенчи çулсене кирлĕ пек пăхса, юсаса, тирпейлесе тăрассишĕн яваплă. Пĕрлешỹ ертỹçи çирĕплетнĕ тăрăх, участоксене хăтлă, тирпейлĕ тытма вĕсен техника та, ĕç алли те, специалистсем те çителĕклĕ. Сезон тапхăрĕнче вара пикенсех çулсене, урамсене тикĕслессипе, асфальт сарассипе тимлеççĕ. Хальхи вăхăтра мĕн пур ĕç вăйне çулсене юртан тасатасси çине яраççĕ. Çил-тăманлă çанталăкра кунĕн-çĕрĕн участоксенчи çулсене тасатаççĕ.

Валерий Петрович юратнă ĕçĕнче çĕнĕ çын мар. И. Н. Ульянов ячĕллĕ Чăваш патшалăх университечĕн строительство факультетĕнче инженер-строитель специальноçне алла илнĕ хыççăнах вăл тỹрех районти çул-йĕр строительствин организацийĕнче ĕç стажне пуçланă. Пиччĕшĕ ДРСУ начальникĕнче тăрăшнă вăхăтра (йывăр тăпри çăмăл пултăр) малтан ахаль çул-йĕр ĕçченĕ пулнă. Каярахпа ăсталăхне туптаса пынă май 2005 çулччен мастерта тăрăшнă. Çав вăхăтрах çамрăк çемье пуçлăхĕ общество пурнăçне те хутшăннă, спорт ăмăртăвĕсенчен те юлман. Çавнашкал хастарлăха, халăхпа пĕр чĕлхе тупса ĕçлеме пултарнине шута илсе Валерий Петровича Тăрăн ял тăрăхĕн пуçлăхне суйланă. 2005 - 2010 çулсенче вăл çак çăмăл мар лава туртнă. Пултаруллă та çаврăнăçуллă ертỹçĕ 2008 çулта "Чăваш Республикинчи ял тăрăхĕн чи лайăх ертỹçи" хисеплĕ ята та илме тивĕçнĕ.

Спорт - уншăн пурнăç çăлăнăçĕ, хавхалану

Юхмапа Пăла тăрăхĕнче халăхăн 53 проценчĕ хăйсен пурнăçне физкультурăпа тата спортпа çыхăнтарнă. Вĕсем хушшинче Кĕçĕн Патăрьел хастарĕ, Патăрьел муниципалитет округĕнчи депутатсен Пухăвĕн депутачĕ Валерий Петрович Рубцов пек лару-тăрура та хавхаланса пурăнаканни урăх пĕр çын та çук. Сăмахăм унăн спортри çитĕнĕвĕ, ỹсĕмĕ, хастарлăхĕ пирки çеç пымасть. Пачах урăх сăлтавпа ăна çапла танлаштаратăп. Çул-йĕр службин ертỹçи паянхи кун чăн-чăн пурнăç паттăрĕ пулнăран, ыттисене хавхалантарма ырă тĕслĕх кăтартнăран ăна вулаканăмăрсене те пĕлтерес килет. Çакна вăл тивĕçлех!

Пытарма кирлĕ мар, хăшĕ-пĕри сывлăхĕ пирки ỹпкелешмест пулин те ытлашши хускану тума та, чупма та, йĕлтĕрпе ярăнма тата ыттине те ỹркенсе тăрать. Валерий Петрович вара çăмăл мар операци хыççăн кăкăр шăмми урлă ют чĕре таппине 10 çул (!) итлет пулин те алла нихăçан та усмасть. Çак хастара яланах Патăрьелĕнчи "Паттăр" ФСКн спорт залĕнче, йĕлтĕр йĕрĕ çинче, стадионта курма пулать. "Малалла, шав малалла! Турăпа пĕрле..." - çапла кĕскен те сăпайлăн çеç хуравларĕ вăл хăйĕн мар чĕрипе çавăн пек пархатарлă та сăваплă ĕçсем туса пынине хурав парса.

 Тăван тетĕшĕ миокард чирне парăнтараймасăр пурнăçран уйрăлса кайнă хыççăн чупса-вĕçсе çỹрекенскер, унпа та хăçан та пулин сывлăх тĕлĕшĕнчен йывăрлăх сиксе тухаса шутламан та. Тухтăрсем çак диагноза лартни ăна та, мăшăрĕпе ачисене те тарăн шухăша янă пулин те, яланах ыррине шанма, малалла ăнтăлма хăнăхнă çемье пуçлăхĕ пур пĕрех икĕ алла усман. Диагноз пурнăçри хăрушă приговор мар-çке! Çавăнпа та тĕп хуламăрти специалистсем чĕрине улăштарни çеç унăн пурнăçне çăлса хăварма пултарнине татăклăн пĕлтерсен операци сĕтелĕ çине выртмах килĕшнĕ. Телее, Мускаври Валерий Шумаков ячĕллĕ клиникăна ăна тỹрех йышăннă. Çапах та трансплант тупăнасса уйăх çурă кĕтме тивнĕ. 2014 çулхи çулла вара унăн чĕрине улăштарнă...

Чун пулсан чул хушшинче те пурăнать, теççĕ ваттисем. Валерий Петрович çак сахал мар тапхăрта мĕн пур йывăрлăха çĕнтерсе çăмăл мар службăна ертсе пыни, общество пурнăçĕнче хастар пулни, çав вăхăтрах спортра та хăйĕн сывлăхне туптани тĕлĕнтерет те, савăнтарать те. Хальхи вăхăтра вăл Контактра социаллă сетьре çĕршыв шайĕнче тĕрлĕ енĕпе иртекен трансплант вăййисен итогĕпе, тĕрлĕрен чире пула пĕр-пĕр органне улăштарнă çынсем хăйсен хастарлăхĕпе хутшăнакан пысăк шайри ăмăртусемпе паллаштарсах тăрать. Чи пĕлтерĕшли - вĕсене хăй те хастар хутшăнни.

- Эпĕ организма ишессипе те, футболла, хоккейла, волейболла выляссипе, йĕлтĕрпе чупассипе те çамрăкранах хăнăхтарнă. Спорт - манăн хобби. Ман пек чирлисем хушшинче трансплантвăйăсем ирттернине вара ăнсăртран Интернетра куртăм та унта хутшăнма заявка тăратрăм. Мана хапăлласах йышăнчĕç. 2022 çулта Мускавра "Пурнăçăн иккĕмĕш шанăçĕ" ятпа пĕрремĕш хут Раççей шайĕнче трансплант вăййисем иртрĕç. Вăл пысăк ăнăçупа палăрса юлчĕ. 25, 50, 100 метра ишессипе ылтăн медальсене çĕнсе илтĕм. Иккĕмĕш трансплантвăйăра та ылтăн, кĕмĕл, пăхăр медальсемпе таврăнтăм.

Иртнĕ çулхи апрельте вара Сочинче "Стальная воля" Пĕтĕм Раççейри футболистсен фестивалĕ иртрĕ. Вăл та маншăн пысăк хавхаланупа вĕçленчĕ. Ăмăртуран çĕнтерỹпе таврăнтăмăр,- çапла кĕскен çеç пайларĕ хăйĕн савăнăçне Валерий Рубцов.

 Сăмах май каласан, Валерий Петрович Тутарстан Республикинчи футбол командин хастар членĕ, муниципалитет округĕнчи триатлон федерацийĕн председателĕ. Хамăр тăрăхра иртекен спорт ăмăртăвĕсене те чылай чухне çемьепе, ачисемпе хутшăнаççĕ Рубцовсем.

 Альбина ЕГОРОВА