Патăрьелĕнчи "Паттăр" стадионта Пĕтĕм Раççейри "Раççей йĕлтĕр йĕрĕ-2024" массăллă чупу иртрĕ.

Унта Патăрьел тата Тăрăн территори пайĕсенчи сывă пурнăç йĕркине кăмăллакансем пуçтарăнчĕç. Кăçал ăна Ленинграда фашист блокадинчен ирĕке кăларнăранпа 80 çул çитнине халалларĕç. Спорт уявне хутшăнакансене Патăрьел муниципалитет округĕн пуçлăхĕ Рудольф Селиванов, республикăри сывлăх сыхлав министрĕн çумĕ Резеда Хуснетдинова, Чăваш Республикин Патшалăх Канашĕн депутачĕ Валерий Антонов, депутатсен Пухăвĕн председателĕ Николай Тинюков, "Планета" кондитерски генеральнăй директорĕ Луиза Дроздова, йĕлтĕр спорчĕн ассоциацийĕн председателĕ Сергей Сафьянов, "Паттăр" спорт шкулĕн директорĕ Анатолий Афанасьев саламларĕç. Йĕлтĕр чупăвĕ "Демографи" наци проекчĕн "Спорт-пурнăç йĕрки" регион проекчĕпе килĕшỹллĕн иртрĕ.

Муниципалитет округĕнче старта шкул çулне çитмен тата вĕсенчен аслăрах тĕрлĕ çулхи ачасем, предприятисемпе организаци ĕçченĕсем, спортсменсем, йĕлтĕр спортне юратакансемпе ветерансем - пурĕ 3560 çын - тăчĕ. Унта хутшăнакансен йышĕ çулран-çул ỹсни савăнтарать. Сăмах май каласан, çак кун кашни ял территори пайĕнчех йĕлтĕр йĕрĕ çине тăчĕç.

Ăмăрту, йăлана кĕнĕ пекех, VIP чупуран пуçланчĕ. Унта округ администрацийĕн пайĕсен начальникĕсем, депутатсем, обществăлла организацисен, предприяти, организаци ертỹçисем хутшăнчĕç.

Çĕнтерỹçĕсемпе призерсем тĕрлĕ шайри дипломсене, медальсене тивĕçрĕç. Спорт уявĕ ăнăçлă иртрĕ. Унта хутшăнакансем хавхалану, савăк кăмăл илчĕç, хăйсемпе пĕр шухăшлисемпе курса калаçрĕç. "Раççей йĕлтĕр йĕрĕ" ăмăрту тепĕр хут Патăрьел муниципалитет округĕнче спортпа туслашасси тата сывă пурнăç йĕркине тытса пырасси анлăн сарăлса пынине уççăн çирĕплетрĕ.

Альбина ИВАНОВА

Владимир ПУТИН, Раççей Федерацийĕн Президенчĕ:

- Спорта аталантармалла, йышăннă мĕн пур программăна пурнăçа кĕртмелле. Маларахри çулсенче регионсенче тата муниципалитетсенче спорта аталантарма федераци бюджетĕнчен 1 миллиард та 700 миллион тенке яхăн уйăрнă. Ку меслет патне таврăнмалла. Çакă çынсене спортпа туслашма, сывă пурнăç йĕркине тытса пыма çĕнĕ майсем туса парĕ, наци сывлăхне çирĕплетме курăмлă тỹпе хывĕ.