ХАЛЬХИ вăхăтра Туçа территори пайĕнчи кашни ялтах Украинăри ятарлă çар операцинчи салтаксем валли хỹтĕлев сеткисем çыхаççĕ, гуманитари пулăшăвĕпе ăшă тумтир, çар пурнăçĕнче кирлĕ ытти япалана та хатĕрлеме хутшăнаççĕ. Ку тĕлĕшпе Вăтаелсем кăтартуллисенчен пĕрисем. Надежда Яковлева староста хăйĕн пысăк çаврăнăçулăхĕпе çак ĕçе питĕ ăнăçлă йĕркелесе пырать. Ял çыннисем те сăваплă ĕçе пĕринчен тепри хастар хутшăнаççĕ. Елена Машина, Антонина Сабаева, Лариса Машина, Луиза тата Зинаида Яковлевасем, Людмила Овечкина, Светлана Печникова, Надежда Торговцева тата ыттисем те сăваплă ĕçе пĕр кун сиктермесĕр çỹреççĕ, хăйсен ырă ĕçне, ăшă саламне салтаксене çитерме тăрăшаççĕ. Ку таранччен вĕсем тĕрлĕ калăпăшлă 30 ытла сетка çыхнă. Нумай пулмасть çеç салтаксене ытти кучченеçпе пĕрлех 100 ытла окоп çурти хатĕрлесе парса янă. Вĕсемпе пĕрле, паллах, ентешсен ăшă саламне те çитернĕ.