1979 çулхи декабрĕн 25-мĕшĕнче Совет çарĕсене Афганистан çĕрне илсе кĕнĕ. 1989 çулхи февралĕн 15-мĕшĕнче юлашки салтак туллă-сăртлă çĕршывпа сыв пуллашнă. Патăрьел муниципалитет округĕнчен вăрçа 104 çын хутшăннă. Шел пулин те, вĕсенчен çиччĕшĕ - Минхайдер Валитов, Александр Журавлев, Геннадий Козлов, Рифкать Куликов, Михаил Мтин, Николай Родионов, Владимир Перлов - ют çĕр- шывра куçне ĕмĕрлĕхех хупнă.

Совет çарĕсене Афганистанран илсе тухнăранпа кăçал 35 çул çитрĕ. Вăхăчĕ самаях иртрĕ пулсан та туллă-сăртлă çĕрте службăра тăнисен чĕринчи вăрçă суранĕсем хăйсем пирки аса илтерсех тăраççĕ. Вĕсем кашни çулах Патăрьелĕнчи танк-палăк умне февралĕн 15-мĕшĕнче пухăнаççĕ. Кăçал та шартлама сивве пăхмасăрах курнăçрĕç. Малтан вара пĕрремĕш класлă çар летчикĕпе Валерий Кузнецов майорпа, Сергей Раськин, Ферид Сулейманов, Олег Муллин афганецсемпе Патăрьел муниципалитет округĕн пуçлăхĕ Рудольф Селиванов тĕл пулчĕ. Калаçу çавра сĕтел хушшинче иртрĕ. Рудольф Васильевич ĕнерхи салтаксене çамрăксене патриотла воспитани парас тĕлĕшпе тăрăшнăшăн тав турĕ, яш-кĕрĕмпе ытларах çыхăну тытма, Афган вăрçи пирки тĕплĕнрех каласа пама, пирĕн салтаксен паттăрлăхĕпе паллаштарма сĕнчĕ. Çавăн пекех ялсене аталантарасси, ачасене тăван тăрăха юратма вĕрентесси пирки тата ытти ыйту тавра та сăмах пычĕ.

Мероприятин малалли пайĕ танк-палăк умĕнче иртрĕ. Афганецсене Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов, Патăрьел тата Шăмăршă районĕсен çар комиссарĕ Вячеслав Илюткин, Раççей Федерацийĕн Хĕç-пăшаллă вăйсен ветеранĕсен Патăрьел округĕнчи канашĕн председателĕ Сергей Шадиряков çарти туслăха малашне те упрама, çирĕп сывлăх сунчĕç.

Митингра пуç хунă ентешсене асăнса пĕр самант шăп тăнă хыççăн танк-палăк умне гирлянда тата чечексем хучĕç.

Ольга ПАВЛОВА