"Сывлăх сыхлавĕ" наци проекчĕн тĕллевĕсене пурнăçа кĕртсе пынă май муниципалитет округĕнчи тĕп больницăна "Земство тухтăрĕ" программăпа тата икĕ çамрăк специалист килнĕ. Елена Сандыркина шăл тухтăрĕ, Анастасия Албутова рентгенолог пулса ĕçлеççĕ.

Иккĕшĕ те И.Н. Ульянов ячĕллĕ Чăваш патшалăх университечĕн медицина факультетĕнчен вĕренсе тухнă. "Манăн килĕшỹллĕ те пысăк çемье сывлăх сыхлавĕн хуралĕнче тăрăшать. Эпĕ ачаранах анне ĕçĕнче нумай хутчен пулнă. Унăн тăрăшулăхне пăхса киленнĕ. Манăн та вылямалли пуканесен шăлĕсене сиплес килетчĕ. Çакăнтан стоматолог пулас ĕмĕт çуралнă та ĕнтĕ, - тет Елена Михайловна.

 "Çуралнă кĕтесе каялла таврăнни маншăн пĕлтерĕшлех. "Земство тухтăрĕ" программа çинчен маларах илтнĕ эпĕ. Çакнашкал программăсем ĕçе кĕни, финанс тĕлĕшĕнчен пулăшу кỹни çамрăк специалистсене чăннипех те хавхалантарать",- тет Анастасия Сергеевна.

Вĕсене кăмăллă пациентсем çеç сунас килет.

Сăмах май каласан "Сывлăх сыхлавĕ" наци проекчĕ пурнăçа кĕме пикеннĕренпе Юхмапа Пăла тăрăхĕнче "Земство тухтăрĕ" программăпа 18 тухтăр, "Земство фельдшерĕ" программăпа 5 фельдшер ĕçе вырнăçнă.

Альбина ИВАНОВА