Çак кунсенче Патăрьелĕнчи бизнес-центрта муниципалитет округĕнчи агропромышленность комплексĕн ветеранĕсен канашĕн отчетпа суйлав пухăвĕ иртрĕ. Унта муниципалитет округĕн пуçлăхĕ Рудольф Селиванов, Чăваш Енри АПК ветеранĕсен канашĕн председателĕ Александр Самылкин хутшăнчĕç.

Халиччен АПК ветеранĕсен союзĕнче 29 член пулнă. Çак кун йыш тата пысăкланчĕ: хăйсен пурнăçне ялпа çыхăнтарнă Иван Дикин, Илья Яковлев, Алексей Петров, Николай Мышов, Николай Пирожков, Рамил Шарафутдинов ыйтса çырнине пурнăçласа пĕр саслăн пулса коллектива илчĕç.

АПК ветеранĕсен округри канашĕн председателĕ Минегали Хафизов хăйсен ĕç-хĕлĕпе паллаштарчĕ. Вăл тивĕçлĕ канăва кайнисем муниципалитетра иртекен чылай мероприятие хутшăннине, çамрăксем вĕсен канашĕсене ăша хывнине, ял хуçалăхĕ юлашки çулсенче лайăх аталаннине, çитĕнỹсенче патшалăх паракан пулăшусен тỹпи пысăккине, çĕр çыннисем хăйсен ĕçне юратса пурнăçланине каларĕ.

 - Эсир пире пулăшакансем, ăс парса пыракансем, - терĕ АПК ветеранĕсене муниципалитет пуçлăхĕ Рудольф Селиванов сăмах илнĕ май. Рудольф Васильевич пурне те округа аталантарассишĕн хăй вăхăтĕнче ырми-канми тăрăшнăшăн тав турĕ, малашне те пĕрле килĕштерсе вăй хурасса шаннине каларĕ. Çавăн пекех муниципалитет пурнăçĕпе кĕскен паллаштарчĕ.

Ял хуçалăхĕнчи иртнĕ çулсен кăтартăвĕпе, кăçалхи тĕллевсемпе АПК ветеранĕсен округри канашĕн председателĕн заместителĕ Тальгат Шакуров паллаштарчĕ. Вăл уй-хир тĕрĕслевĕ вăхăтĕнче ял хуçалăх предприятийĕсемпе фермер хуçалăхĕсен хирĕсене çитсе курни, уйсем таса пулни, çĕнĕ технологисемпе усă курни, техника паркĕ çуллен пуянланни пирки чарăнса тăчĕ.

Отчетпа суйлав канашлăвĕ пулнă май АПК ветеранĕсем канашăн председателĕпе унăн заместительне те суйларĕç. Çăмăл мар тивĕçе пурнăçлама пĕр саслăн Минегали Хафизовах шанчĕç, унăн çумĕн ĕçне те Тальгат Шакуровах пурнăçлать.

Чăваш Енри АПК ветеранĕсен канашĕн председателĕ Александр Самылкин ĕç ветеранĕсене муниципалитет, республика аталанăвĕшĕн малашне те пĕрлехи вăйпа тăрăшса ĕçлеме сунчĕ.

Ольга ПАВЛОВА