Сăкăтри культура çуртĕнче ялти халăх хорĕ 90 çул çитнине паллă турĕç. Ăна йĕркелесе яраканĕ Федор Нртин пулнă. Тĕрлĕ вăхăтри вара хора П.Ильин, И.Медведев ертсе пынă. 2007 çултанпа пĕр улшăнмасăр артистсене Николай Толстов юрлаттарать.

Сăкăт халăх хорĕ Чăваш Республикинчи чи ватă коллективсенчен пĕри. "Халăх" ятне вăл 1995 çулта тивĕçнĕ. Коллектив район, республика, регионсем хушшинчи смотр-конкурспа фестивальсенче темиçе хутчен те лауреат, дипломант пулнă. Хальхи вăхăтра хора 39 çын çỹрет. Вĕсем тĕрлĕ професси тата ỹсĕм çыннисем. Пурне те халăх ăсталăхне тата юрра юратни пĕрлештерет.

Коллектива малашнехи ĕçре ăнăçу сунса Патăрьел муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Валерий Антонов, муниципалитет округĕнчи депутатсен Пухăвĕн председателĕ Николай Тинюков тата ытти хăнасем саламларĕç.

Рудольф Васильевич хор коллективне тата ертỹçине халăх йăли-йĕркине упраса пырас ĕçре тăрăшуллă пулнăшăн тав турĕ, юрăçсем муниципалитет округĕн мăнаçлăхĕ пулнине палăртрĕ.

Альбина КАПИТОНОВА