Тăрăн ялĕнче пурăнакан Анна Макаева ĕç ветеранĕ 90 çул тултарнине паллă турĕ. Çак ятпа ун патне Патăрьел муниципалитет округĕн пуçлăхĕн Рудольф Селивановăн саламне тата парнине çитерчĕç. Ялти клубăн культорганизаторĕ Татьяна Медведева тата библиотекарĕ Нина Мазякова юбиляршăна савăк юрăсемпе савăнтарчĕç.

Анна Андреевнан кăмăлĕ тулчĕ. Çулĕпе çамрăк мар, сывлăхĕпе хавшакрах пулин те хăйне ялăн хисеплĕ çынни вырăнĕнче туйма май пани савăнтарчĕ ăна.

Анна Макаева нумай çул стройкăра ĕçленĕ. Вăл сахал мар çурт-йĕр çĕкленĕ çĕре хутшăннă. Район больницин никĕсне хывнă чухне пĕрремĕш кирпĕче хунине паянхи пекех астăвать.

Мăшăрĕпе, Петр Семеновичпа, вĕсем виçĕ ывăлпа хĕр пăхса çитĕнтернĕ. Ачисем пурте пĕлỹ илнĕ, мăшăрланнă, тĕрлĕ хулара пурăнаççĕ. Тăван киле манмаççĕ. Амăшĕ патне килсех çỹреççĕ. Унăн 5 мăнукпа 4 кĕçĕн мăнук ỹсет.

 Нина ВАСИЛЬЕВА