СĂВĂРСЕМ хĕл ыйхинчен вăранса шăтăксенчен тухни чăнласах та çуркунне çитнине систерет. Кăçал Патăрьел муниципалитет округĕнчи "Сăрçи" заповедникĕнче сăвăрсем пĕр эрне каяллах, мартăн 18-мĕшĕнче, пĕрремĕш хут шăтăкĕсенчен пуçне кăтартнă. Вăтаелпе Тутар Тимеш ялĕсем хушшинче вырнаçнă сăрт çамки çывăхĕнчи çĕр айĕнче пурăнакан чĕрчунсем вăраннă-вăранманах курăк шырама тытăнаççĕ. Хальхинче те çаплах пулнă. Унсăр пуçне хĕл ыйхинче пулнă чухне организмран çухатнă шывне саплаштарас тĕлĕшпе юр та çиеççĕ. Специалистсем çирĕплетнĕ тăрăх, сăвăрсем вăтамран мартăн 30-мĕшĕччен пурте шăтăкĕсенчен тухса пĕтеççĕ.