Раççей Федерацийĕн Президенчĕ Владимир Путин мартăн 23-мĕшĕнче халăх патне Чĕнỹпе тухрĕ. Çавăн пекех çĕршыв ертỹçи пĕлтернипе вырсарникун Хурлăх кунĕ пулчĕ.

Аса илтеретпĕр, мартăн 22-мĕшĕнче Мускав облаçĕнчи Красногорск хулинчи "Крокус Сити Холл" концерт залĕнче теракт пулнă. Хăрушă инкекре 137 çын вилнĕ. Ку хисеп тата та ỹсме пултарать. Концерт курма пухăннисем пăшалтан пенипе тата вут чĕртнĕрен сĕрĕмпе чыхăнса пурнăçран уйрăлнă.

4 террориста Брянск облаçĕнче тытса чарнă.

Çак пысăк инкек пирĕн çĕршывра пурăнакансене тата ытларах пĕрлештерчĕ. Хурлăх кунĕнче халăх тĕрлĕ вырăна чечексем йăтса утрĕ, каç пулнă май çуртасем çутрĕ, 20 сехетре "Тăрнасем" ятлă акцие хутшăнчĕ. Юхмапа Пăла тăрăхĕнче те мĕн пур савăнăçлă мероприятисене пăрахăçларĕç. Чи пĕлтерĕшли усалăн халăх сăн-пичĕ те, тĕн палăрăмĕ те çук. Усал вăл усал.

Александр ИВАНОВ