Муниципалитет округĕн администрацийĕн залĕнче Юхмапа Пăла тăрăхĕнче 2023 çулта спирт хутăшлă шĕвеке ĕçсе наркăмăшланнă тĕслĕхсене тишкерес енĕпе канашлу иртнĕ. Унта муниципалитет округĕн администрацийĕн, республикăри экономика аталанăвĕпе пурлăх хутшăнăвĕсен министерствин, Патăрьел район больницин ĕçченĕсем, республикăри сывлăх сыхлавĕн министерствин штатра тăман тĕп токсикологĕ хутшăннă.

Канашлăва муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов ертсе пынă. Вăл вырăнти суту-илỹ рынокĕнчи лару-тăрупа паллаштарнă.

Спирт хутăшлă шĕвеке ĕçсе наркăмăшланнă тĕслĕхсем пирки республикăри экономика аталанăвĕпе пурлăх хутшăнăвĕсен министерствин этил спирчĕпе алкоголь тата спирт хутăшлă шĕвеке туса илекен, сутакан ĕç-хĕле тимлекен управленийĕн начальникĕ Ирина Козицина тухса каланă.

Асăннă ыйтăва малалла тăсса муниципалитет шайĕнчи тишкерĕве район больницин тĕп врачĕ Николай Тинюков тунă. Шалти ĕçсен министерстви ку енĕпе еплерех ĕçлесе пынипе РФ ШĔМĕн муниципалитетсем хушшинчи "Батыревский" уйрăмĕн полици начальникĕн çумĕ Алексей Быков паллаштарнă.

Республикăри сывлăх сыхлав министерствин штатра тăман тĕп токсикологĕ Надежда Смелова çут çанталăк тата хими япалисене пула наркăмăшланннисене мĕнле пулăшмалли çинче чарăнса тăнă.

Экономика аталанăвĕпе пурлăх хутшăнăвĕсен министерствин тĕрĕслев, алкоголь рынокĕн мониторингĕн тата административлă практика пайĕн начальникĕн çумĕ Светлана Капитонова патшалăхăн пĕрлĕхлĕ автоматизациленĕ информаци системине кĕрекен алкоголь продукцине сутакан объектсемпе мĕнле ĕçленине паллаштарнă.

Пĕлсе тăма

 2023 çулта муниципалитет округĕнче пахалăхсăр алкоголь продукцие пула 33-61 çулсенчи 5 хĕрарăмпа 5 арçын наркăмăшланнине шута илнĕ. Шел пулин те, вĕсенчен саккăрăшĕ вилнĕ.

Ĕçекенсем ытларах этанолпа, паллă мар спирт хутăшăпе (денатурат, одеколон, парфюмери хатĕрĕсем, кĕленче тасатакан, тормоз шĕвекĕсем, алкоголь суррогачĕсем, техника спирчĕсем, тосол, этиленгликоль), ытти спиртсемпе, метанолпа, пропанолпа, сивуш çăвĕпе усă курнипе нуша кураççĕ.

Алкоголь шĕвекĕсене йỹн хакпа алăран, лицензисĕр, ятарлă акциз маркисемсĕр, завод чĕркемĕсĕр сутакан вырăнтан ан туянăр. Интернет урлă дистанциллĕ майпа сĕнекен тавара та хирĕçлĕр. Ăна лицензи пур ятарлă суту-илỹ вырăнĕсенчен çеç туянăр..

Çапах та сертификациленĕ алкоголь продукципе те ытлашши иртĕнмелле мар. Виçесĕр ĕçни вилĕм патне илсе пырать. Çавăн пекех техника шĕвекĕсене, косметика, йăлара кирлĕ пулакан хими хатĕрĕсене те çăвар патне илсе пыма тăхтăр.

Альбина ИВАНОВА