Муниципалитетра çулленех культура урежденийĕсем хушшинче "Хавхалану çăлкуçĕсем" фестиваль иртет. Кăçал ăна Раççейри Çемье çулталăкне халалланă. Мероприятие халăх пултарулăхне, йăли-йĕркине упрас, аталантарас, коллективсен тата уйрăм çынсен репертуарне пуянлатас, пултаруллă çĕнĕ юрă-ташă ăстасене тупса палăртас тĕллевпе йĕркеленĕ.

Суйлав турĕсем мартăн 21-22-мĕшĕсенче ялсенчи культурăпа кану учрежденийĕсенче иртнĕ. Вĕсене ял территорийĕсенчи пултарулăх коллективĕсем хутшăнса сцена çине тĕрлĕ жанрпа тухнă: хор, вокал тата инструмент ансамблĕсем, фольклор коллективĕсем, юрлакан ушкăнсем, çемье коллективĕсем, театрализаци... Пултарулăх ушкăнĕсен концерт программисем пуян, кашнийĕн хăйне евĕрлĕ, костюмсем тĕрлĕрен пулнипе, çĕнĕлĕхсемпе палăрнă.

Чи лайăх номерсене Патăрьелĕнчи культурăпа кану центрĕнче апрелĕн 3-мĕшĕнче иртнĕ гала-концертра кăтартнă. Хăнасемпе фестивале хутшăнакансене Патăрьел муниципалитет округĕн администрацийĕн культура, туризм тата информаци тивĕçтерĕвĕн пайĕн начальникĕ Наталия Никитина саламланă. Вăл "Культура" наци проекчĕ пулăшнипе муниципалитетра çĕнĕ культура "вучахĕсем" хута кайнине, пултарулăх ушкăнĕсене çакă тата ытларах аталанма май панине каланă. Çавăн пекех Патăрьелĕнчи централизациленĕ клуб системин директорĕ Наталия Алексеева та сăмах илнĕ, ăнăçу суннă.

Гала-концерта хутшăнакансем сцена çинчи ăсталăхшăн, пултарулăхшăн лауреат дипломĕсене тивĕçнĕ.

Ольга БЕЛЬДЕКОВА