Патăрьелĕнчи культурăпа кану центрĕнче муниципалитет округĕнчи 8 территори пайĕнчен пуçтарăннă пултаруллă та чипер пикесем хушшинче "Чăваш пики-2024" конкурс иртрĕ.

Сцена çинче чиперккесем акăш евĕр ярăнса çỹрерĕç, илемлĕ юрăсем шăрантарчĕç, сăпайлăн авкаланса ташларĕç, сăвăласа калаçрĕç. Чăваш тумĕпе, уяв кĕпипе илĕртỹллĕн хăйсемпе паллаштарчĕç. Апат-çимĕç пĕçерме пултарнине кăтартрĕç. Тĕрлине хатĕрленĕ конкурсантсем. Сĕтел çийĕ йăтăнса тăчĕ. Техĕмлĕ шăрттан, хуплу, пỹремеч шăрши зала сарăлчĕ. Ỹркенмен хĕрсем кăпăклă, тутлă килти кваса та тума пĕлеççĕ иккен. Çак ĕçре вĕсене асламăшĕсем пулăшнине те пытармарĕç.

 Конкурса кашнийĕ тĕплĕн хатĕрленни палăрчĕ. Жюри членĕсем пурин пултарулăхне хак пачĕç. "Чăваш пики-2024" ята Пăлапуç Пашьелĕнчи Анастасия Бахитова çĕнсе илчĕ. "Вице-Чăваш пики-2024" Именкассинчи Карина Корнилова пулчĕ. Кĕçĕн Патăрьелĕнчи Мадина Никитина "Çепĕç пике" номинацие тивĕçрĕ. Нăрваш Шăхалĕнчи Валентина Кистол - "Ăста пике". Çĕнĕ Ахпỹртри Валентина Тарасова "Тараватлă пике" пулнипе палăрчĕ. Сител ялĕнчи Диана Выросова "Пултаруллă пике" ята тивĕçрĕ. Алманчăри Анастасия Аппакова - "Илĕртỹллĕ пике". Патăрьелĕнчи Селеста Сергеева вара "Хỹхĕм пике" номинацинче палăрчĕ.

Альбина КАПИТОНОВА