Патăрьел муниципалитет округĕн администрацийĕн ларусем ирттермелли Пысăк залĕнче майăн 13-мĕшĕнче организаци-учреждени, структура подразделенийĕсен, территори пайĕсен начальникĕсем хутшăннипе анлă лару иртрĕ. Ăна муниципалитет округĕн пуçлăхĕ Рудольф Селиванов ертсе пычĕ.

Апрелĕн 26-мĕшĕнчен пуçласа майăн 5-мĕшĕччен Мускаври ВДНХри "Раççей" курав-форумра Чăваш Республикин экспозицийĕнче Патăрьел муниципалитет кунĕсем иртрĕç. Округ пуçлăхĕн социаллă ыйтусемпе ĕçлекен çумĕ - финанс пайĕн начальникĕ Светлана Чернова кĕскен Юхмапа Пăла тăрăхĕн кураври ĕç-хĕлне пĕтĕмлетрĕ. Вăл çĕршывăн тĕп хулинче йĕркеленĕ мероприятие 13 коллектив хутшăннине, курма пынă 31 пин çынна юрă-ташăпа, ал ĕç ăстисен пултарулăхĕпе, Патăрьелсен пурнăçĕпе, экономикипе туллин паллаштарма тăрăшнине, кашни пулăма социаллă сетьсем урлă çутатнине каларĕ.

Аслă Çĕнтерĕве халалласа йĕркеленĕ мероприятисем пирки те Светлана Алексеевна чарăнса тăчĕ. Патăрьелĕнчи тата ялсенчи палăк-монументсем патне чечексем хунисĕр пуçне Патăрьел муниципалитет округĕн пуçлăхĕ Рудольф Селиванов тата ыттисем те округри Тăван çĕршывăн Аслă вăрçин икĕ ветеранĕ патне çитсе саламланă, çĕнтерỹшĕн тав тунă. Çавăн пекех велочупу, кадетсен балĕ, "Çĕнтерỹ чỹречисем" тата ытти акци иртнĕ. Уяв Патăрьелĕнчи кану паркĕнче йĕркеленĕ "Çĕнтерỹ яланах пирĕнпе" концертпа вĕçленнĕ.

Республикăра çулленех "Ачалăхшăн, ачалăх ячĕпе" марафон иртет. Кăçал та ырă йăлана малалла тăснă. 2023 çулта Патăрьел тăрăхĕнчи 100 ытла предприяти хутшăннă, 400 пин ытла укçа пухăннă. Хальхи вăхăта 13 организаци 85 пин тенкĕ уйăрнă. Светлана Чернова çывăх вăхăтра ыттисем те марафона хастар хутшăнасса шаннине палăртрĕ.

 Çурхи ĕçсемпе Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов паллаштарчĕ. Вăл çут çанталăк условийĕсене пула ака ирттерме кăçал çăмăлах маррине, çанталăк лайăхлатса кайсанах палăртнă тĕллевсене пурнăçлассине, çакна валли условисем пуррине каларĕ.

Ларура Патăрьелĕнчи газ участокĕн мастерĕ Александр Раськин та сăмах илчĕ. Вăл газ приборĕсен юсавлăхне пăхсах тăмаллине, вĕсене планпа килĕшỹллĕн тĕрĕслеттермеллине аса илтерчĕ.

Ольга ПАВЛОВА