- Кивĕ Ахпỹртсем "Авангарда" кăмăлласа çырăнаççĕ,- тет Туçа почта уйрăмĕн начальникĕ Светлана Черноярова. - Рита Каргина почтальонка хăйĕн планне малтанхи акци вăхăтĕнчех çурри ытла пурнăçланăччĕ. Ку хутĕнче ирттерсе те çырăнтарчĕ. Туçари Надежда Николаева та правур ĕçлет. Ыттисем те хастар.

Кунти почта уйрăмне паянхи кун "Авангард" 229 экземпляр килсе тăрать. Ун хыççăн "Çамрăксен хаçатне" кăмăллаççĕ.

"Тиевĕ" аванах почтальонкăсен. Хаçат валеçнисĕр пуçне пенси укçине хуçисем патне çитермелле. "Ĕç ветеранĕшĕн" парăнаканнине салатмалла. Тавар та сĕнме манмалла мар. Ялсенче почта уйрăмĕсем çукран ватăсене электричествăшăн, газпа усă курнăшăн тỹлевĕпе татăлмашкăн пулăшмалла.

Килĕрен 2-3 экземпляр хаçат çырăнакансем пур-ха. Теприсем вара хăш-пĕр хаçатпа журнала çырăнтарăва кĕмесĕр илсе килсе пама ыйтаççĕ. Ĕç кунĕсене чакарчĕç пулин те почтальонкăсен ĕç калăпăшĕ пĕртте сахалланмарĕ.

Çавах хастарлăхпа тăрăшаççĕ почта уйрăмĕнче. Çырăнтару кампанийĕ вĕçлениччен подпискăна тата та ỹстересшĕн-ха вĕсем.

Альбина ИВАНОВА