ИЮНĔН 17-мĕшĕнче каçхине пирĕн тăрăхра чылай вăхăт шăрăх çанталăк тăнă хыççăн аслатиллĕ çумăр лỹшкентерчĕ, вăйлă çил унталла та кунталла çавăрттарчĕ... Хура пĕлĕтсем хуçаланнăран пĕр вăхăт тавралăх тĕксĕмленсех ларчĕ. Паллах, çут çанталăк пулăмне хирĕç каяймăпăр. Çапах та çакнашкал "ахăрсамана" пĕр йĕрсĕр иртсе кайманни те паллă.

Патăрьел муниципалитет округĕн администрацийĕн гражданла хỹтĕлев, чрезвычайлă лару-тăру тата ятарлă программăсен пай начальникĕ Григорий Каллин хаçат редакцине пĕлтернĕ тăрăх, вăйлă çиле пула Патăрьел, Шăнкăртам, Алманчă, Тутар Сăкăт, Тикеш, Кĕçĕн Патăрьел ялĕсенче вăхăтлăха электроçутă пĕтсе ларнă. Ытти чухнехи пекех пăтăрмаха парăнтарма çийĕнчех электриксен виçĕ бригади çула тухнă.